«Яндэкс» прызнаў праслухоўванне карыстальнікаў «разумнай калонкі»

Калонка «Аліса» праслухоўвае карыстальнікаў, нават калі яны не называюць яе імя.

"Яндэкс" пасля выцечкі фрагментаў кода сэрвісаў кампаніі прызнаў, што разумная калонка "Аліса" праслухоўвае карыстальнікаў, нават калі яны не называюць яе імя, але толькі ў бэта-версіі. Пра гэта a target="_blank" href=https://yandex.ru/company/press_releases/2023/30-01-2023>паведамляе прэс-служба "Яндэкса".

У кампаніі прызналі, што супрацоўнікі маглі дыстанцыйна ўключаць мікрафоны на "Алісе" на некалькі секундаў у выпадковы момант. Прадстаўнікі "Яндэкса" заяўляюць, што такая настройка ўжываецца "ў бэта-версіі калонкі і выкарыстоўваюцца для праверкі карэктнасці працы сэрвісаў".

У "Яндэксе" заяўляюць, што алгарытм, які праслухоўвае, выкарыстоўваўся толькі ўнутры кампаніі, каб, да прыкладу, палепшыць якасць актывацыі асістэнта і паменшыць колькасць ілжывых спрацоўванняў.

"Наша праца будуецца на прынцыпах сумленнасці і празрыстасці. Мы зыходзім з таго, што любы ўнутраны дыялог, дакумент ці зыходны код пры пэўных абставінах можа стаць публічным. І калі гэта здарыцца, нам не павінна быць сорамна. Цяпер нам вельмі сорамна, і мы прыносім прабачэнні нашым карыстальнікам і партнёрам", – заявілі ў "Яндэксе".

Нагадаем, пра выцечку фрагментаў праграмнага кода некаторых сэрвісаў "Яндэкса" стала вядома 26 студзеня. Праз чатыры дні "Яндэкс" апублікаваў вынікі папярэдняга расследавання, з якога стала вядома, што фрагменты зыходнага кода сэрвісаў былі ўзятыя з унутранага рэпазітара, з якім працуюць распрацоўнікі. Кампанія правяла аўдыт і знайшла сур'ёзныя парушэнні ўласных правілаў: напрыклад, у некаторых частках кода былі словы, абразлівыя для людзей розных расаў і нацыянальнасцяў, а ў сэрвісах таксі і дастаўкі адны карыстальнікі былі больш прыярытэтнымі для падтрымкі, чым іншыя. Пры гэтым у кампаніі заявілі, што ў сетку выцекла састарэлая версія кода і што выцечка не нясе небяспекі для карыстальнікаў і працаздольнасці сэрвісаў.