У Гародні пачаўся закрыты суд над Анджэем Пачобутам

Яму пагражае да 12 гадоў пазбаўлення волі.

Гарадзенскі абласны суд пачаў 16 студзеня разгляд крымінальнай справы ў дачыненні да вядомага гарадзенскага журналіста і сябра незалежнага «Саюзу палякаў Беларусі» Анджэя Пачобута. Разгляд справы журналіста неаднаразова пераносілі: спачатку працэс прызначалі на 28 лістапада, затым на 9 студзеня, зараз-на 16 студзеня 2023 года, паведамляе «Вясна».

Судовы працэс вядзе суддзя Дзмітрый Бубенчык.

Палітвязня абвінавачваюць у закліках да дзеянняў «абмежавальнага характару, скіраваных на прычыненне шкоды нацыянальнай бяспецы Беларусі» (ч. 3 арт. 361 Крымінальнага кодэкса), а таксама ў «распальванні іншай сацыяльнай варожасці» (ч. 3 арт. (арт. 130 Крымінальнага кодэкса).

Анджэй Пачобут быў затрыманы 25 сакавіка 2021 года ў Гародні пасля ператрусу ў сваім доме. Пасля яго даставілі ў цэнтральны апарат Следчага камітэта ў Менску, дзе адбыўся допыт. Яго пакінулі пад вартай у СІЗА-1 на Валадарскага ў пачатку ў статусе падазраванага ў крымінальнай справе паводле ч. 3 арт. 130 Крымінальнага кодэкса. Пазней быў пераведзены ў жодзінскую следчую турму № 8. Зараз - у турме №1 Гародні.

4 кастрычніка 2022 года КДБ дадаў журналіста ў «спіс асоб, якія маюць дачыненне да тэрарыстычнай дзейнасці».

У сярэдзіне жніўня 2022 года, калі Пачобут пачаў знаёміцца са справай, стала вядома, што яму таксама выставілі абвінавачанне на падставе ч. 3 арт. 361 КК («заклікі да мераў абмежавальнага характару (санкцый), накіраваных на прычыненне шкоды нацыянальнай бяспецы»).

У Пачобута ёсць сур'ёзныя праблемы са здароўем, пры гэтым яго змяшчалі ў карцар. Журналісту практычна блакуюць ліставанне, асабліва на польскай мове.

Раней, у 2013 годзе, Анджэй Пачобут быў асуджаны з адтэрміноўкай прысуду па крымінальнай справе за нібыта паклёп на Лукашэнку. Быў вызвалены ад адбывання пакарання ў сувязі з тым, што ён не парушаў заканадаўства - паклёпу ў ягоных словах новы суд не знайшоў.

Як стала вядома, судовы працэс будзе праходзіць у закрытым рэжыме. На гэтым намагаў бок пракуратуры. На працэс спачатку пусцілі толькі найбліжэйшых сваякоў і некалькіх актывістаў. Пазней усіх выставілі ў калідор. Журналісту можа пагражаць ад 5 да 12 гадоў пазбаўлення свабоды.