У Беларусі значна падаражэла садавіна

Некаторая - амаль на палову.

Першае, што ў крамах і на рынках здзівіла беларусаў у новым годзе, - гэта значнае і істотнае падаражанне садавіны. Цытрусавыя да 5 рублёў падскочылі яшчэ да 31 снежня. Цяпер месцамі амаль на палову падняліся кошты вінаграду, пайшлі ўгору і кошты яблык.

Чым гэта абумоўлена і як спыніць падаражанне садавіны?

Пра гэта «Радыё Рацыя» пацікавілася ў грамадзян:

- Перавозка дарагая, можа, гэта ўплывае, не ведаю. Але кошты ўсе розныя. Мусіць, вось гэтую коштавую палітыку трэба перагледзець.

- А што зробіш? Вялікія транспартныя выдаткі. Што мы можам зрабіць? Бензін дарагі, самі ведаеце. Але ўсё адно трэба рэгуляваць, бо празмерна дорага.

- Як танней? Не есці вёдрамі, а пакрыху. І ўсё.

- Я думаю, на гэта павінны звярнуць увагу ўлады. А як яшчэ?

Як раней пісаў сайт Charter97.org, у пачатку гэтага года прэм'ер Беларусі Раман Галоўчанка заявіў, што рост коштаў у 2023 годзе непазбежны.