Лукашысты арыштавалі менчука за шапку з «Пагоняй»

«Суд» арыштаваў яго на 15 дзён.

Суд Ленінскага раёна Менска пастанавіў адправіць пад адміністрацыйны арышт жыхара Менска, віна якога палягала ў тым, што ён насіў шапку. На шапцы была нашыўка з выявай гістарычнага герба Беларусі «Пагоня», паведамляе праваабарончы цэнтр «Вясна».

Мужчыну затрымалі ў сярэдзіне снежня. У Ленінскім РУУС на яго склалі пратакол на падставе арт.24.23 КоАП аб тым, што ён «несанкцыянавана ажыццяўляў пікетаванне шапкай з нашыўкай герба «Пагоня».

Суддзя Юлія Інчына прызнала яго «вінаватым у пікетаванні» і адправіла за краты на 15 дзён.

Нагадаем, «Пагоня» была гербам ВКЛ у XIV-XVIII стагоддзях і з'яўляецца гісторыка-культурнай каштоўнасцю. Абноўлены варыянт «Пагоні» ў 1991—1995 гадах быў дзяржаўным гербам Беларусі.