Рэальная сітуацыя ў Салядары і Бахмуце: звесткі ISW

Амерыканскія аналітыкі адзначаюць вялікае знясіленне расейскіх войскаў.

Расейскія сілы, магчыма, кантралююць увесь Салядар. Аднак захоп усяго горада не стане важнай падзеяй у аператыўным значэнні і наўрад ці прадвесціць немінучую аблогу Бахмута.

Пра гэта паведамляе Інстытут вывучэння вайны (ISW).

Са звестак аналітыкаў, украінскія сілы больш не падтрымліваюць арганізаваную абарону ў Салядары.

Войскі РФ, магчыма, выцеснілі ўкраінскія сілы з заходняй ускраіны горада.

Аналітыкі адзначылі, што Генштаб УСУ 12 студзеня ў асноўным не паведамляў аб тым, што ўкраінскія сілы адбілі расейскія атакі на Салядар у параўнанні са справаздачамі днём раней.

Расейскія крыніцы сцвярджалі, што расейскія сілы вядуць зачыстку Салядара.

Расейскія блогеры 12 студзеня размясцілі кадры, на якіх «вагнераўцы» свабодна гуляюць па Салядары, і заявілі, што яны наведвалі населены пункт разам з расейскімі войскамі, пішуць экспэрты.

На іх думку, заява прэзідэнта Украіны Уладзіміра Зяленскага ад 12 студзеня аб тым, што ўкраінскія сілы захоўваюць пазіцыі ў Салядары, можа мець на ўвазе абарончыя пазіцыі побач, але не ў Салядары.

Расейскія інфармацыйныя аперацыі перабольшылі важнасць Салядара, што ў найлепшым выпадку з'яўляецца «піравай тактычнай перамогай», мяркуюць экспэрты.

ISW па-ранейшаму мяркуе, што захоп Салядара - не дазволіць расейскім сілам усталяваць кантроль над крытычна важнымі ўкраінскімі наземнымі камунікацыямі ў Бахмуце, а таксама не палепшыць становішча расейскіх войскаў для аблогі горада найбліжэйшым часам.

Расейскія сілы, магчыма, захапілі Салядар пасля таго, як накіравалі значныя рэсурсы для тактычнай перамогі з вялікім знясіленнем, якое паскорыць магчымую кульмінацыю аслабленых расейскіх сіл пад Бахмутам, рэзюмуюць у ISW.