Клічко заявіў, што яму пагражалі пазбаўленнем украінскага грамадзянства

Мэр Кіева сцвярджае, што на яго ціснуць праз подпіс ліста ў падтрымку Корбана.

Мэр Кіева Віталь Клічко заяўляе, што яму пагражалі з Офіса прэзідэнта пазбаўленнем украінскага грамадзянства праз тое, што ён падпісаў адкрыты ліст са зваротам да Зяленскага аб вяртанні грамадзянства бізнэсоўцу і кіраўніку тэрытарыяльнай абароны Днепрапятроўскай вобласці Генадзю Корбану.

Пра гэта мэр Кіева Віталь Клічко расказаў у інтэрв'ю выданню «Бабель».

Ён зазначыў, што сам прыняў пастанову падпісаць адпаведны ліст.

«Сёння пра тыя крокі, якія я раблю, мяне прасіць не трэба, бо ўважа іх за правільныя. Трэба аб'ядноўваць намаганні і максімальна выкарыстоўваць эфектыўнасць кожнага чалавека, кожнага мэнэджара, а не ствараць штучныя інтрыгі ці перашкоды. Раскажу вам таямніцу. Пасля таго як я падпісаў ліст, была ў мяне размова з намёкам: «Ты такі актыўны, мы яшчэ за тваё нямецкае грамадзянства не браліся». Я кажу: «Я буду вельмі здзіўлены, калі мне пакажуць ды яшчэ і адбяруць пашпарт Нямеччыны», - заўважыў Клічко.

Клічко запэўнівае, што ніякага іншага грамадзянства, акрамя ўкраінскага, у яго няма.

«Я буду вельмі здзіўлены, калі нехта мне зможа паказаць «мой» амерыканскі ці нямецкі пашпарт, каб адабраць украінскі. Я сапраўды большую частку свайго жыцця правёў у Нямеччыне і ў Амерыцы. І магчымасць атрымаць грамадзянства ў мяне была, былі нават такія прапановы, але навошта? Я быў і застаюся грамадзянінам Украіны, іншых пашпартоў у мяне няма.

Клічко адмовіўся наўпрост адказваць на ўдакладняльныя пытанні, з кім менавіта адбылася такая размова: «Знімем гэтае пытанне».

«Ну а адкуль? З ЖЭКа?», - адказаў ён на прамое пытанне, ці ініцыявалі размову з Банкавай.

У гэтым жа інтэрв'ю Клічко заяўляў, што ў Офісе прэзідэнта Украіны ён размаўляе толькі з намеснікам кіраўніка АП Кірылам Цімашэнкам.

Каментуючы сітуацыю з Корбанам, Клічко адзначае: «Яшчэ раз хачу падкрэсліць: павінна быць дакладнае разуменне - усё павінна адбывацца паводле адзіных прынцыпах для ўсіх, а не выбарачна. У гэтым выпадку выглядае так: мы ў гэтага забярэм, а гэтым мы пакуль пакінем, каб яны былі больш паслухмянымі, разумелі, што ў іх мы таксама можам забраць. Патрэбны дакладны закон, для ўсіх адзін, а не выбарачнае прыняцце пастаноў».