Партугалія дазволіла Абрамовічу продаж «Чэлсі»
2- 26.05.2022, 14:11
- 2,534
Даходы будуць накіраваныя на гуманітарныя мэты.
Партугалія дала дазвол уладальніку «Чэлсі» Раману Абрамовічу на продаж ангельскага футбольнага клуба. Нацыянальная пазіцыя Партугаліі была ўзгодненая з Еўрапейскай камісіяй.
Пра гэта паведамляе прэс-служба МЗС Партугаліі.
«Партугалія ў сераду ўвечары дала дабро на продаж футбольнага клуба «Чэлсі». Два кампетэнтныя нацыянальныя органы - Міністэрства замежных спраў і Міністэрства фінансаў - далі зялёнае святло просьбе Рамана Абрамовіча аб гуманітарным адступленні, што дазволіла ажыццявіць угоду з ангельскім клубам», - гаворыцца ў паведамленні.
У міністэрстве падкрэслілі, што дазвол выцякае з запэўненняў брытанскіх улад у тым, што даходы ад продажу будуць выкарыстаныя ў гуманітарных мэтах і не прынясуць наўпроставай або ўскоснай выгады ўладальніку клуба, які знаходзіцца ў санкцыйным спісе ЕЗ.
Адзначым, кансорцыум Boehly падпісаў з Абрамовічам пагадненне аб куплі «Чэлсі». Як паведамлялі брытанскія СМІ, сума ўгоды складае 5,24 млрд даляраў.
Пастанову аб продажы «Чэлсі» Абрамовіч прыняў у пачатку сакавіка. Ён таксама заявіў, што на атрыманыя грошы будзе створаны фонд для падтрымкі Украіны.