Пуцін сказаў Макрону і Шольцу аб падрыхтоўцы ўказа аб прызнанні «ДНР» і «ЛНР»
28- 21.02.2022, 21:15
- 13,290
Найбліжэйшым часам прэзідэнт РФ выступіць са зваротам.
Расейскі прэзідэнт Уладзімір Пуцін найбліжэйшым часам падпіша ўказ аб прызнанні «ДНР» і «ЛНР».
Пра гэта Пуцін заявіў прэзідэнту Францыі Эмануэлю Макрону і канцлеру ФРГ Олафу Шольцу, вынікае з паведамлення, апублікаванага на сайце Крамля.
У размове Пуцін расказаў Макрону і Шольцу аб тым, што ў Крамлі прайшло пашыранае пасяджэнне Савета бяспекі Расеі. На ім «разглядалася бягучая сітуацыя вакол Данбаса ў кантэксце пастановы Дзяржаўнай Думы аб пытанні прызнання Данецкай і Луганскай народных рэспублік». Таксама Пуцін нагадаў, што да Расеі звярнулася кіраўніцтва «ДНР» і «ЛНР» і папрасіла прызнаць іх «у сувязі з вайсковай агрэсіяй украінскай улады, масаванымі абстрэламі тэрыторыі Данбаса, у выніку чаго пакутуе цывільнае насельніцтва».