Беларуска ледзь не купіла курынае філе за 91 рубель

Фотафакт.

Крысціна знайшла ў менскай «Кароне» курынае філе Віцебскай бройлернай птушкафабрыкі, цэннік якога прапанаваў заплаціць за звычайны латок 91 рубель 46 капеек. Дапускаем, што калі-небудзь філе будзе столькі каштаваць, але толькі не ў Беларусі лютага 2022 года, дзе ўсе кошты запісаныя. І галоўнае: а калі выявіць такое, прыйшоўшы дадому?

- Гэта стандартны латок на 1-1,5 кг. А яго можна было машынальна пакласці сабе ў кошык і купіць... - разважае Крысціна. Кошт на латку звычайны, а вось вага - быццам кнопка заліпла на вагах.

Безгатоўкавыя плацяжы моцна спрасцілі расстанне з грашыма. Таму гаворка не пра тое, што чытачка вельмі багатая (калі не – то зычым!). Проста плацяжы здзяйсняюцца прыкладаннем карты/тэлефона, чэкі не заўсёды правяраюцца, як і SMS аб спісанні, піша «Онлайнер».

Са слоў «Кароны», шанцы аплаціць і сысці з такой курыцай дадому ў пакупніка нікчэмныя.

- Касірка правярае вагавы тавар на касе пры разліку. Калі разлік рабіўся б праз касу самаабслугоўвання, разыходжанне ў вазе не дало б здзейсніць аплату без праверкі асістэнтам.

Звычайна тавар мы атрымліваем з указаннем вагі вытворцам. У гэтым выпадку вагу тавару ўводзілі ўручную. Гэта памылка з боку персаналу.

І нават калі вы нейкім чынам прынеслі такі тавар дадому - мы прымем яго назад. Кожную куплю можна адсачыць, - удакладнілі ў сетцы.