CIT: Перакідка сіл з іншых рэгіёнаў РФ да межаў Украіны падышла да канца

Адбываецца выхад на зыходныя пазіцыі для магчымага наступу.

Група расследавання Conflict Intelligence Team (CIT) на аснове фота і відэа, якія з'явіліся ў апошнія дні ў адкрытых крыніцах, сцвярджае, што перакідка сіл з іншых рэгіёнаў Расеі да межаў Украіны, магчыма, падышла да канца, «і відавочна адбываецца выхад на зыходныя пазіцыі для магчымага наступу», паведамляе svoboda.org.

CIT указвае на тое, што ў апошнія дні характар руху расейскай тэхнікі ля межаў Украіны значна змяніўся. «Калі раней гусенічную тэхніку (танкі, БМП, САУ) везлі амаль выключна на чыгуначных платформах і танкавых транспарцёрах, то цяпер яны амаль усюды звычайна рухаюцца сваім ходам. Больш за тое, часта гэты рух адбываецца за лічаныя кіламетры ад мяжы».

CIT згадвае таксама аб сведчаннях таго, што некаторыя расейскія жаўнеры на мяжы знаходзяцца ў цяжкіх умовах: спяць у набітых бітком памяшканнях і не атрымліваюць цэнтралізаванага харчавання. «Доўга трымаць войскі ў такіх умовах немагчыма, таму ў найбліжэйшыя дні можна чакаць або наступу, або частковага адводу войскаў», - піша група расследавання. Сапраўднасць фатаграфіі, якая з'явілася ў сацсетках, на якой, як сцвярджаецца, расейскія жаўнеры, якія ляжалі на падлозе, на адной са станцый ля ўкраінскай мяжы, пакуль не пацверджаная.

Таксама сцвярджаецца, што на тэрыторыі цэнтральнай гарадской лякарні горада Шабекіна, усяго за 5 кіламетраў ад мяжы, размешчаны палявы шпіталь.

Прэзідэнт ЗША Джо Байдэн у суботу са спасылкай на інфармацыю выведкі заявіў, што, на ягоную думку, расейскі прэзідэнт Пуцін прыняў пастанову аб наступе на Украіну, аднак яго яшчэ можна паспрабаваць пераканаць.

Паводле апошніх ацэнак заходніх афіцыйных асоб, каля межаў з Украінай засяроджана блізу 150 тысяч расейскіх вайскоўцаў.

У апошнія дні значна абвастрылася сітуацыя ў зоне канфлікту на Данбасе, што, як асцерагаюцца на Захадзе, можа быць выкарыстанае Масквой як падстава для ўварвання.