«Містар Ніхто»

Аб новым амплуа Лукашэнкі.

Калі савецкі міністр Грамыка быў «містарам Не», дык беларускага кіраўніка цяпер можна назваць «містарам Ніхто», піша Віталь Цыганкоў у сваім блогу на «Радыё Свабода».

16 лютага Уладзімір Макей нечакана і без бачнай прычыны склікаў прэс-канферэнцыю, на якой даволі адназначна сказаў важную фразу: «Ніводнага вайскоўзца, ніводнай адзінкі баявой тэхнікі не застанецца пасля гэтых вучэнняў».

Нагадаем, што адбылося пасля гэтага. Лукашэнка паехаў у Маскву, дзе «разам з Пуціным» яны вызначылі, што расейскія войскі пасля вучэнняў пакуль застануцца ў Беларусі.

Спадзяюся, нікому не прыйдзе ў галаву, што Макей выдаў нейкую «адсябяціну», не параіўшыся ў такім стратэгічным пытанні з Лукашэнкам. Хутчэй за ўсё, выконваў яго наўпроставы загад.

Як трапна заўважыў калега Валерый Карбалевіч «прэс-канферэнцыя Макея закліканая была паказаць, што МЗС Беларусі ўсё яшчэ існуе і ў яго ёсць кіраўнік».

Не атрымалася. Міністэрства ёсць, але замежных спраў даўно ўжо няма.

Міністэрства ператварылася ў нейкі аддзел адміністрацыі прэзідэнта па справах прапаганды і ідэалогіі.

І калі савецкі міністр Грамыка быў «містарам Не», то Макея цяпер можна назваць «містарам Ніхто».

Але добра Макей. Сам Лукашэнка ператвараецца ў такога незразумелага Ніхто, які на ўсякае пытанне цяпер адказвае: «Мне трэба параіцца з шэфам»... Гэта значыць, «старэйшым братам».

«Ці будуць выведзеныя расейскія войскі пасля вучэнняў»? - «Выведзем тады, калі наважым з прэзідэнтам Расеі гэта зрабіць і калі скончацца тут вучэнні. Гэта мы будзем прымаць пастанову: гэта наша тэрыторыя».

«Як доўга вы думаеце заставацца прэзідэнтам»? - пытае расейскі журналіст.

«Што да майго прэзідэнцтва, то вось мы цяпер са старэйшым братам параімся і вызначым. Што вы хвалюецеся? Усё будзе нармальна», - адказвае Лукашэнка.

Цікава, што беларускія афіцыйныя медыя гэтую фразу не рэтранслююць. Хтосьці наверсе, відаць, адчуў, наколькі абразліва і зневажальна яна гучыць для «суверэннага і самастойнага лідара». (Але расейскія СМІ са зларадным задавальненнем яе працытавалі).

Лукашэнка ўжо не кіруе тым, што адбываецца з Беларуссю, не кантралюе працэсаў, якія ідуць вакол краіны - гэта становіцца відавочным для ўсіх удзельнікаў працэсу. Для Захаду, для Крамля, і галоўнае - для грамадзян Беларусі.