Рада ЕЗ прыняла пастанову аб выдзяленні Украіне 1,2 мільярда еўраў крэдыту
7- 21.02.2022, 15:20
- 2,310
Створаная новая экстранная праграма макрафінансавай дапамогі для краіны.
У панядзелак, 21 лютага, Рада Еўрапейскага Звязу прыняла пастанову аб выдзяленні Украіне дадатковых рэсурсаў фінансавай падтрымкі шляхам стварэння новай экстраннай праграмы макрафінансавай дапамогі ў суме 1,2 млрд еўраў крэдыту.
Пра гэта «Унія» паведаміла прэс-служба Міністэрства фінансаў Украіны.
«Пастанова ЕЗ аб фінансавай падтрымцы Украіны прынятая ў беспрэцэдэнтна кароткія тэрміны. Мы надзвычай удзячны нашым еўрапейскім партнёрам за давер і важкі ўнёсак у забеспячэнне макрафінансавай стабільнасці Украіны», - адзначыў міністр фінансаў Украіны Сяргей Марчанка.
Адзначаецца, што першая рата з'яўляецца безумоўнай і будзе выдзеленая пасля набыцця моцы Мемарандума аб узаемаразуменні і Крэдытнай дамовы аб магчымасці надання Украіне льготных крэдытных сродкаў.
Выдача другой раты будзе абумоўленая прагрэсам, прадэманстраваным Украінай у рэалізацыі ўзгодненых бакамі кароткатэрміновых мерапрыемстваў па ўкараненні структурных рэформ у прыярытэтных сферах: узмацненне эканамічнай устойлівасці і стабільнасці, вяршэнства права і энэргетыка.