Навошта барысаўскі «Белтэлекам» закупляе даламітавую муку?

Сельская гаспадарка ў Беларусі даўно ўжо з'яўляецца своеасаблівай «чорнай дзіркай».

Напярэдадні пачатку новага сельскагаспадарчага сезона барысаўскія прадпрыемствы пры пасрэдніцтве ўправы сельскай гаспадаркі і харчаванні Барысаўскага райвыканкама закупілі 12 965,8 тон даламіту некальцынаванага ў выглядзе парашка (мукі) на агульную суму 663 997,64 рублёў. Мэтай набыцця ўказаны работы для вапнавання кіслых глеб у адпаведнасці з Указам «Аб дзяржаўнай аграрнай палітыцы» ад 17.07.2014 года №347, звяртае ўвагу сайт ex-press.by.

Беларусь - адна з краін-вытворцаў даламітавай мукі. На сайце вытворцы адзначана, што гадавы аб'ём вытворчасці мукі складае прыблізна 4,3 млн тон.

Паколькі па ступені кіслотнасці ў Беларусі пераважаюць моцнакіслыя і кіслыя глебы, то ўнясенне нейтралізуючых рэчываў з'яўляецца неабходнай умовай вядзення сельскай гаспадаркі. Доза ўнясення даламітавай мукі залежыць ад структуры глеб і ступені яе кіслотнасці і вагаецца ад 200 г на 1 квадратны метр на лёгкіх глебах (пясчаных, супясчаных і лёгкіх сугліністых), да 900 г на 1 квадратны метр - на цяжкіх (суглінках, глінах) і падзолістых.

Набытых барысаўскімі заказчыкамі ўгнаенняў, такім чынам, дастаткова, каб раскісліць ад 12 да 65 квадратных кіламетраў глебы. Для параўнання, плошча Барысава складае бязмала 46 «квадратаў».

Спіс раённых прадпрыемстваў, якія набылі даламітавую муку, даволі вялікі. Акрамя тых, якія павінны займацца сельскай гаспадаркай, што называецца, «па змаўчанні», у доўгім пераліку можна знайсці і дастаткова нечаканыя брэнды.

Напрыклад, ААТ «Барысаўскі завод агрэгатаў», ААТ «Барысаўскі завод «Аўтагідраўзмацняльнік», ПУП «ПАПЯРОВАЯ ФАБРЫКА», РУП электрасувязі «БЕЛТЭЛЕКАМ».

І, калі верыць сайту дзяржаўных закупак, усе яны найбліжэйшым часам будуць занятыя раскісленнем сельскагаспадарчых глеб. Чаму, зрэшты, не варта дзівіцца.

Сельская гаспадарка ў Беларусі даўно ўжо з'яўляецца своеасаблівай «чорнай дзіркай», якая высмоктвае з бюджэту вялізныя фінансавыя рэсурсы. А каб утрымліваць галіну на паверхні, на дапамогу прыцягваюцца не толькі дзяржаўныя грошы, але і прамысловыя прадпрыемствы, на якія «зверху» ўскладаюць неўласцівыя для іх абавязкі.