Добры знак: У Беларусь вярнуліся буслы

У нашу краіну ідзе вясна!

У розных мясцінах краіны выяўляюцца фармальныя прыкметы прыходу вясны. І гэта ўжо не проста занадта высокая для лютага тэмпература, піша «Онлайнер».

У небе чулі крыкі гусей, да кагосьці завіталі буслы, а да самых шчаслівых прыйшоў заспаны клешч. Вясна, сябры!.

«Ахова птушак Бацькаўшчыны» паведамляе: у Івацэвіцкі раён вярнуліся як мінімум чатыры буслы і пачалі абнаўляць гнёзды.

На онлайн-трансляцыі, якая вядзецца з Белавежскай пушчы, чуваць крыкі шэрых жураўлёў, а таксама галасы гусей і соек. У кадры ў асноўным пуста, але, магчыма, калі вы не будзеце ніколі міргаць, то здолееце заўважыць і саміх птушак.

На Прыпяцкім Палессі разгуляліся першыя кляшчы - а яны ведаюць толк у народных прыметах і не прачынаюцца раней, чым трэба. Не думаеце ж вы, што кляшчы здольныя памыляцца?

Чытачка Таццяна з Гарадзенскай вобласці таксама хваліцца кляшчом: ён, з яе слоў, расплюшчыў вочкі яшчэ 12 лютага. У тых жа краях павылазілі пралескі.

А вы ўжо заўважылі прыкметы вясны?