Літва адрэагавала на заяву аб тым, што расейскія войскі застаюцца ў Беларусі.

Прэзідэнт Гітанас Наўседа выступіў з заявай.

Падаўжэнне праверкі сіл рэагавання і працяг маштабных вучэнняў Беларусі і Расеі нясуць пагрозу суседнім краінам і бяспецы ў Еўропе. Пра гэта гаворыцца ў заяве прэзідэнта Літвы Гітанаса Наўседы.

«Заявы аб падаўжэнні надзвычай буйных расейскіх і беларускіх вайсковых манеўраў на тэрыторыі Беларусі нясуць напружанасць і пагрозу не толькі суседнім краінам, але і бяспецы Еўропы. Невыкананне публічна абвешчаных тэрмінаў вайсковых вучэнняў з'яўляецца чарговым грубым парушэннем абавязанняў Венскай дамовы. Незвычайны сваімі маштабамі і тэрмінах рух расейскіх і беларускіх сіл патрабуе дадатковых мер стрымлівання і бяспекі ў Літве і цягам усяго ўсходняга флангу NАТО», - заявіў Наўседа.

Прэзідэнт Літвы запэўніў, што разам з хаўруснікамі зробіць усё, каб ні ў каго не ўзнікла жадання праверыць рашучасць удзельнікаў NАТО выканаць абавязанні бяспекі.

У Мінабароны Літвы ўжо заявілі аб гатоўнасці павялічыць бюджэтныя асігнаванні для паскарэння закупкі РСЗА і беспілотнікаў, а таксама выказалі намер павялічыць кантынгент краін NАТО.