NYT: Выведка ЗША даведалася аб загадзе Пуціна

Менавіта гэтыя звесткі паўплывалі на заяву Байдэна.

На мінулым тыдні выведка ЗША даведалася, што Крэмль загадаў расейскім вайскоўцам далей рыхтавацца да ўварвання ва Украіну. Менавіта гэта заахвоціла амерыканскага прэзідэнта Джо Байдэна заявіць, што Уладзімір Пуцін прыняў пастанову аб нападзе, паведамляе NYT са спасылкай на чыноўнікаў Злучаных Штатаў, піша "Новое время".

Як піша газета, яны адмовіліся апісваць якія-небудзь падрабязнасці выведвальных звестак, каб захаваць у таямніцы свае метады збору інфармацыі. У той жа час супрацоўнікі выведкі заявілі адміністрацыі прэзідэнта ЗША, што маюць да звестак высокі ўзровень даверу і сабралі іх на працягу апошніх месяцаў. Размова ідзе аб плане Расеі аб уварванні ва Украіну і змове маскоўскіх спецслужбаў, каб стварыць для гэтага нагоду.

Новыя звесткі ЗША сведчаць аб тым, што ад 40 да 50% з больш чым 150 тысяч расейскіх войскаў, сканцэнтраваных каля межаў Украіны, перайшлі з падрыхтоўкі да баявых фармаванняў і "могуць пачаць поўнамаштабнае ўварванне на працягу некалькіх дзён", заявілі амерыканскія чыноўнікі 18 лютага. Як піша NYT, з іх слоў, частку з іх складаюць расейскія рэзервісты, якія "стануць акупацыйнымі войскамі пасля ўварвання".

NYT паведамляе, што заява Байдэна аб упэўненасці ў тым, што Пуцін прыняў пастанову аб нападзе — "апошні залп у кампаніі адміністрацыі для выкарыстання рассакрэчаных звестак выведкі для таго, каб выкрыць і сарваць планы Крамля, магчыма, запаволіць уварванне і атрымаць больш часу для дыпламатыі".

У той жа час, нягледзячы на звесткі аб тым, што Пуцін прыняў пастанову аб уварванні ва Украіну, высокапастаўленыя чыноўнікі з адміністрацыі прэзідэнта заявілі, што акно для дыпламатыі дагэтуль застаецца адкрытым і кіраўнік Крамля яшчэ можа спыніць свой план аб нападзе, адзначае газета.

Як піша CNN са спасылкай на двух амерыканскіх чыноўнікаў, звесткі выведкі аб загадзе тактычным камандзірам працягнуць падрыхтоўку да атакі – адзін з некалькіх індыкатараў, за якімі ЗША назіраюць, каб ацаніць, ці пачала Расея завяршальную стадыю падрыхтоўкі да патэнцыйнага ўварвання.

Суразмоўцы выдання папярэдзілі, што загады заўсёды могуць адкласці ці гэта можа быць дэзінфармацыя, якая павінна ўвесці ў зман ЗША і хаўруснікаў.