«Найбліжэйшыя дні будуць аднымі з самых складаных для Сініх пальцаў»
31- 21.02.2022, 13:24
- 52,162
Наменклатура чакае тлумачэнняў.
Telegram-канал «Нік і Майк» разважае на тэму расейскіх войскаў у Беларусі:
- Найбліжэйшыя дні будуць аднымі з самых складаных для Сініх пальцаў. Яму трэба будзе дэзавуяваць для прыхільнікаў і наменклатуры адразу два пасланні, якія здарыліся на выходных. Абодва пасланні вельмі непрыемныя і нават ганебныя для чалавека, які ўважае сябе за гаспадара на тэрыторыі.
Першае пасланне - пра старэйшага брата, які вызначыць, колькі Сінім пальцам панаваць.
Другое пасланне - працяг тэрмінаў знаходжання расейскіх войскаў у Беларусі, а фактычна - поўная і канчатковая страта суб'ектнасці.
Мы ўжо паведамлялі, што першы факт выклікаў здзіўленне ў калідорах улады. Другі факт, а таксама тое, што першым абвясціў аб нявывадзе расейскіх войскаў Вальфовіч, прымусіў наменклатуру і вайсковы блок задумацца яшчэ больш.
У папярэдніх публікацыях была інфармацыя аб тым, якая цудоўная кампанія ўтварылася ў Савеце бяспекі. Там агулам шмат людзей з расейскімі каранямі, якія мараць атрымаць расейскія заробкі. Аднак яшчэ раз нагадваем, што здраднікаў усюды ўважаюць за здраднікаў.
І калі ад Вальфовіча, Арчакова, Белаконева і іншых вар'ятаў чакаць нічога іншага не даводзіцца, то тым, у каго засталося чым думаць, і хто даваў прысягу служыць Беларусі, яшчэ ёсць час раздумацца. Як кажа Сяргей Чалы, адрачэнне - не ёсць здрада.
Увогуле, паводле інфармацыі з калідораў, тлумачэнняў чакаюць усе. І тлумачыць становіцца ўсё больш складана. Бо расейскія эшалоны працягваюць запаўняць Беларусь. Бо саступак з боку Крамля няма. А грошы калі і даюцца, то пад будаўніцтва жылля для расейскіх вайскоўцаў, што зноў жа слаба карэлюе з суб'ектнасцю.
Стаўка Ніка - за перамогу давядзецца выдаваць дабраславенне «рэферэндуму». Перамога настолькі ж сумнеўная, наколькі сумнеўны і «рэферэндум». Перамогу можна намаляваць, але ўсё менш шанцаў, што гэта верне страчаную суб'ектнасць. А хутчэй за ўсё, аформіць спісанне ва ўтыль. І гледзячы на прыклад Казахстана Сінія пальцы гэта таксама разумеюць.
Таму не выключым іншы варыянт - зноў брыкнуць і скасаваць рэферэндум зусім. Але цяпер спаць будзе страшна класціся не толькі ў маскоўскім гатэлі, але і ў Драздах. У Афганістан савецкую армію Амін таксама запрасіў сам.
Што рабіць беларусам? Барацьба за права лічыцца еўрапейскай нацыяй першапачаткова складалася з двух этапаў. Чыстай перамогі ў першым раўндзе не адбылося. Але беларусы здолелі паскорыць працэсы. Дэ-факта Сінія пальцы ператварыліся ў палітычнага трупа менавіта ў жніўні-2020. Раўнд яшчэ не скончыўся, а ўжо абвешчаны старт другога.
На рынг ужо выскачыў новы апанент - Пуцін. Цяпер беларусам давядзецца змагацца адразу з двума апанентамі для таго, каб адчуць сябе па-сапраўднаму свабоднымі. Скажам крамолу, але, магчыма, такая кампрэсія часу - гэта гістарычны шанец вырвацца са сферы ўплыву Расеі. Калі ў нейкай часткі вашых знаёмых яшчэ заставаліся надзеі на Пуціна, то ў вас найлепшая магчымасць патлумачыць, да чаго ўсё гэта можа прывесці.
Літва, Латвія і Эстонія зрабілі свой геапалітычны выбар раней. Украіна спрабуе абараніць права вызначыць свой вектар развіцця самастойна зараз. Беларусь не знаходзіцца ў авангардзе працэсу барацьбы, але проста пад бокам ёсць вялікі прыклад таго, як украінцы гатовы абараняць сваю радзіму. Яны акурат зразумелі, што спадзявацца трэба толькі на сябе. Таму і пасылаюць усіх куды далей з Менскімі пагадненнямі.
Беларусь таксама выратуюць толькі беларусы. Змагайся за Беларусь, калі ты супраць Лукашэнкі. Змагайся за Беларусь, калі ты супраць Пуціна. Змагайся за Беларусь!