У Кітаі новая хваля COVID-19: колькасць заражаных імкліва расце

У медустановах краіны знаходзіцца амаль у 30 разоў больш інфікаваных, чым год таму.

У Кітаі ў апошнія тыдні значна павялічылася колькасць захварэлых на COVID-19. Спецыялісты гавораць аб новай хвалі каранавіруса, піша ТАСС.

Паводле звестак Дзяржаўнага камітэта ў пытаннях гігіены і аховы здароўя КНР, за мінулы дзень выяўлена больш як 7,6 тысячы новых выпадкаў заражэння. Гэта максімальны прырост з пачатку траўня.

Насцярожвае і той факт, што цяпер у медустановах знаходзіцца амаль у 30 разоў больш інфікаваных, чым год таму.

Улады краіны паведамляюць, што інфікаваныя ёсць на тэрыторыі ўсіх адміністрацыйных адзінак мацерыковага Кітая на ўзроўні правінцыі, аўтаномнага раёна і горада цэнтральнага падпарадкавання.

Пры гэтым у краіне захоўваюцца жорсткія антыковідныя захады. Напрыклад, у транспарце і ў грамадскіх месцах у Пекіне абавязковае нашэнне масак. У крамах і іншых такіх установах на ўваходзе абавязкова правяраюць «код здароўя» - праграму на смартфоне, якая пацвярджае, што чалавек за апошнія некалькі дзён афіцыйна не зазнаў уздзеяння эпідэмічных фактараў.