УСУ пачалі новую фазу наступу на Херсон і «пасунулі» фронт на 20 км

Расейскія войскі адыходзяць, нават не спрабуючы прыняць бой.

Новы этап наступу Сіл абароны Украіны ў Херсонскай вобласці пачаўся 2 кастрычніка. З таго часу ўкраінскія ваяры пасунулі лінію фронту на 20 км, дасягнуўшы ўсходняга берага ракі Інгулец і заходняга берага Дняпра і набліжаючыся да часова акупаванай Новай Кахоўкі.

Пад націскам украінскага войска расейскія акупанты, як правіла, адыходзяць, часта нават не спрабуючы прыняць бой. Пра гэта ў аналітычнай зводцы паведамілі ў міністэрстве абароны Вялікабрытаніі раніцай 6 кастрычніка.

Са звестак брытанскага абароннага ведамства, з моманту пачатку новага этапу наступальных дзеянняў у Херсонскай вобласці 2 кастрычніка ўкраінскія войскі змаглі пасунуць лінію фронту яшчэ на 20 км углыб акупаваных Расеяй тэрыторый рэгіёна.

«Прасоўваючыся на поўдзень, украінскія падраздзяленні прасунулі лінію фронту яшчэ на 20 км, галоўным чынам дасягаючы ўсходняга берага Інгульца і заходняга берага Дняпра, але яшчэ не пагражаючы асноўным расейскім абаронным пазіцыям. Расейскія войскі звычайна парушаюць кантакт і адыходзяць. Расейскія камандзіры, магчыма, будуць разглядаць рост пагрозы для накіравання Новай Кахоўкі як адну з найбольш актуальных праблем», - адзначылі ў мінабароны Брытаніі.

Там таксама нагадалі, што менавіта ў раёне Новай Кахоўкі размешчаны мост Кахоўскай ГЭС. Нягледзячы на сур'ёзныя пашкоджанні, у гэтым раёне ён застаецца адным з нямногіх даступных для расейскіх войскаў шляхоў папаўнення сіл.

Цяпер расейскае камандаванне стаіць перад дылемай: узмацніць сваю здольнасць утрымаць хаця б частку акупаванай Херсоншчыны або выконваць загады Крамля, рызыкуючы страціць увесь рэгіён.

«Расея стаіць перад дылемай: адвод баявых сіл за Дняпро робіць абарону астатняй частцы Херсонскай вобласці больш надзейнай, але палітычным імператывам будзе заставацца і абараняцца», - перакананыя ў Брытаніі.

Брытанская выведка таксама канстатавала, што цяпер РФ перакідвае большую частку сваіх паветрана-дэсантных сіл, якія пакутуюць ад значнага недахопу асабовага складу, у Херсон на фоне контрнаступу УСУ. У бой супраць украінскіх ваяроў, хутчэй за ўсё, будуць кідаць толькі што мабілізаваных расейцаў.

«Такім чынам, Расея пакуль мае крыху дадатковых высакаякасных сіл хуткага разгортвання для стабілізацыі фронту: яна, магчыма, мае на мэце разгарнуць мабілізаваных рэзервістаў у гэтым сектары», – адзначылі ў мінабароны Брытаніі.