Што цяпер з 12-гадовым Раманам, які выратаваў свайго брата з палаючага дома?

Пра гэта распавяла яго мама Марыя.

Стан 12-гадовага Ромы, які вынес з агню свайго маленькага брата, стабільна цяжкі, распавядае tut.by яго мама Марыя. Паляпшэнні, прадаўжае яна, ёсць, але пакуль лекары паведамляюць, што казаць пра штосьці рана, - наперадзе вельмі шмат аперацый.

Нагадаем, 28 красавіка ўвечары ў сям'і Марыі адбылася бяда. Калі муж паехаў у суседні пасёлак, каб сустрэць яе з працы, у іх доме ў вёсцы Сідаравічах Мядзельскага раёна здарыўся пажар. Дома ў гэты час знаходзіліся двое хлопчыкаў: 12-гадовы Рома і яго брат Ваня, якому год і чатыры месяцы. Яшчэ адзін брат - 6-гадовы Міша - быў у сяброў.

Цяпер Рома знаходзіцца ў Рэспубліканскім апёкавым цэнтры. Мама з цёткай Святланай сёння едуць у Менск, каб яго наведаць.

- Учора я таксама была ў яго, размаўляла з ім, ён мяне чуе, рэагуе на голас. Можна нават сказаць, бурна рэагуе. Губкамі, ножкамі, - распавядае пра сына Марыя. - Я яму ўчора чытала...Набыла тры кнігі. Адну навуковую, звязаную з тэхнікай, другую - «Прыгоды капітана Врунгеля» і трэцюю - розныя вершы. Учора, калі чытала яму вершы пра школу і спорт, ён ножкамі рэагаваў. Ён у нас спартовец. Перадавала прывітанні ад усіх. Калі казала пра Мішу і Янку (малодшыя браты), ён таксама вельмі рэагаваў.

- Як вы самі?

- Прымаю таблеткі і стараюся трымацца. Хаджу на працу, тры дні адпрацую, потым еду ў Менск, так і трымаюся. Пабуду з малодшымі дзецьмі, пагуляю крыху, абстрагуюся, - апісвае свой стан Марыя. - Ваня (брацік, якога Рома выратаваў), дзякуй Богу, нармальна, а Мішу мы патлумачылі, што Рома хварэе. Падрабязнасцяў не расказвалі, каб ён моцна не перажываў.

Са слоў Марыі, ім прапанавалі дом у вёсцы Занарачы Мядзельскага раёна. Пакуль сям'я туды яшчэ не пераехала.

- Жыллё абстаўляюць, прыводзяць у парадак. Магчыма, сёння перададуць ключы, - распавядае Марыя. - Мы размаўлялі з начальнікам УКБ Мядзельскага раёна. Ён казаў, што яны дапамогуць нам з будаўніцтвам дома. Калі шчыра, падрабязнасцяў я не ведаю, усім гэтым займаецца муж.

А яшчэ, кажа Марыя, яны прадаўжаюць атрымліваць падтрымку ад добрых людзей - шматлікія пішуць, тэлефануюць.

- На днях мяне набрала пенсіянерка з Гародні. Кажа, пенсія ў мяне невялікая, але так хочацца вас хоць крыху падтрымаць. Можна, я хоць бы пералічу вам грошай на тэлефон, - з дрыготкай у голасе ўспамінае гэты момант Марыя. - Я разгубілася, не ведала, што сказаць. Я ніколі не думала, што побач столькі добрых людзей. Дзякуй ім усім вялікі яшчэ раз.

Нагадаем, напярэдадні намеснік галоўнага лекара БСМП Ігар Шыманскі паведаміў, што стан хлопчыка застаецца цяжкім, але ёсць невялікая станоўчая дынаміка - ён стабілізаваўся. На гэты момант арганізм хлопчыка спраўляецца. Праводзіцца ўсё неабходнае лячэнне, у тым ліку выконваюцца аператыўныя ўмяшанні.

Лекар таксама адзначыў, што цяпер даваць нейкія папярэднія прагнозы заўчасна, бо плошча апёкаў у дзіцяці вялікая. Ужо выкананыя 2 аператыўныя ўмяшанні на пашкоджаных участках цела, аперацыі будуць выконвацца з інтэрвалам 2-3 дні. Ужываюцца ўсе самыя сучасныя метады лячэння, у тым ліку ідзе гаворка аб клеткавых тэхналогіях.