Алег Дулуб: Народ павярнуўся да спартоўцаў, якія не прамаўчалі

Такія рэчы, як свабода выказвання, свабода думкі ў футбалістаў і вынікі, якасць гульні - гэтыя два паняцці ўзаемазвязаныя.

Галоўны трэнер «Крумкачоў» Алег Дулуб падзяліўся з «Трыбунай» меркаваннем пра каманду Беларусі.

«Мы часта чуем такое пытанне: «Вы што, хочаце, як ва Украіне?» Але чым Украіна адрозніваецца ад Беларусі? Там людзі выказваюць сваё меркаванне адкрыта. Не падабаецца ім нешта, яны шчыра так і кажуць. У нас такога няма, і гэта, напэўна, наклала адбітак на дзяцей і іх паводзіны. Тыя спартоўцы, якія ўбачылі, як жывуць у іншых краінах, у большасці сваёй не прамаўчалі. І да іх павярнуўся народ.

Думаю, такія рэчы, як свабода выказвання, свабода думкі ў футбалістаў і вынікі, якасць гульні - гэтыя два паняцці ўзаемазвязаныя. Як ужо сказаў, каманда магла стаць нацыянальным героем, але яна першапачаткова няправільна павяла сябе перад матчам з Грузіяй. Усе чакалі ад калектыву нейкага руху, а не проста слоў, што футбалісты гуляюць за народ. Калі б гэта было сапраўды так, то вы павінны былі памерці на полі, павінны былі перамагчы. А перад гэтым, мне здаецца, гульцы маглі запісаць ролік для сваіх заўзятараў, выступіць і сказаць, што камандзе патрэбна падтрымка. Але гэтага не адбылося.

Больш за тое, тыя заўзятары, якія былі на матчы ў Грузіі, распавядалі, што пасля паразы футбалісты ішлі міма трыбун, апусціўшы галовы, і нават не падзякавалі людзям. На словах яны гуляюць за народ, а на справе?

Гульцоў хочуць ператварыць у бязмоўных спартоўцаў, пастаянна паўтараючы, што тое, што робіцца ў Беларусі - гэта не іх справа. Выбачайце, футбалісты - такія ж грамадзяне сваёй краіны. Вырасла іншае пакаленне, больш свабоднае. І, паўтаруся, не можа не адбівацца на гульні і на выніках каманды тое, што хлопцы носяць думкі і перажыванні ў сабе», - сказаў Дулуб.