Ізраільскі медык: Можа прыйсці вірус істотна больш небяспечны, чым COVID-19

Свет незваротна змяніўся.

Грамадства і ўрады дзяржаў павінны змяніць сваё стаўленне да лекараў і аховы здароўя, альбо пачнуць адбывацца сумныя эксцэсы. Пра гэта ў інтэрв'ю выданню "Гордон" распавёў медыцынскі дырэктар Першага медцэнтра Тэль-Авіва Юрый Ранькоў.

"Людзі хочуць на ўсё забыцца і ўвайсці ў звыклую каляіну. Але я думаю, свет незваротна змяніўся. Нават той, хто ўжо атрымаў вакцыну, праз восем месяцаў станецца безабаронным перад каранавірусам. Мы надоўга ў гэтай гісторыі з нашэннем масак, сацыяльнай дыстанцыяй, асабістай гігіенай, неабходнасцю сачыць за ўзроўнем антыцелаў. Гэта не апошні вірус, які кінуў нам выклік. Гэта не апошняя пандэмія. І наступная можа стацца на парадак цяжэйшай. Можа прыйсці вірус істотна больш вірулентны, чым каранавірус. Эпідэміёлагі прадказваюць нам такі сцэнар за кошт змянення клімату і павелічэння папуляцыі людзей", - заявіў Ранькоў.

На ягоную думку, людзям трэба змяніць стаўленне да свайго здароўя.

"Я думаю, у найбліжэйшай будучыні зменіцца некалькі рэчаў. Па-першае, стаўленне да ўласнага здароўя, па-другое, - грамадскі заказ на адказнасць. Грамадства становіцца менш талерантным да грэбавання здароўем", - сказаў доктар.

Ён адзначыў, што ўсім дзяржавам варта надаваць больш увагі развіццю аховы здароўя.

"Як я чуў, на прасторы былога СССР прэстыж медыцынскай прафесіі моцна ўпаў. На маю думку, альбо супольнасць і ўрады гэтых краін зменяць стаўленне да лекараў і аховы здароўя, альбо пачнуць адбывацца сумныя эксцэсы. Недастатковы ўзровень падрыхтоўкі медыкаў і недафінансавання галіны прывядуць да вельмі непажаданых наступстваў. Нам вельмі пашанцавала, што вірус не настолькі вірулентнасці, што хутка ўдалося стварыць вакцыну, што ўвесь свет аб'яднаўся ў пошуках выйсця. Але гэтага ўсё яшчэ недастаткова. Калі мы не возьмем урокі і не будзем развіваць нацыянальныя сістэмы аховы здароўя, міжнароднае медыцынскае супрацоўніцтва, наперадзе нас чакаюць вялікія цяжкасці", - падкрэсліў Ранькоў.