Amazon створыць сваю сетку спадарожнікаў для раздачы інтэрнэту

Хуткасць інтэрнэту будзе вышэйшай, чым у Starlink.

Кампанія Amazon прадпрымальніка Джэфа Безаса створыць уласную сетку спадарожнікаў для раздачы інтэрнэту ва ўсім свеце. Праз год плануецца запуск першых двух прататыпаў інтэрнэт-спадарожнікаў Kuiper, паведаміла напярэдадні выданне The Verge.

Абодва прататыпы спадарожнікаў, якія атрымалі назвы KuiperSat-1 і KuiperSat-2, будуць выведзены на арбіту з дапамогай ракеты RS1. Яе распрацоўвае стартап ABL Space Systems у Каліфорніі. Ракета зможа выводзіць на арбіту да 1,5 тон грузу. Кошт аднаго запуску складзе амаль 12 млн даляраў.

Усяго Amazon мае намер запусціць у космас 3236 спадарожнікаў на працягу наступнага дзесяцігоддзя. Гэта падобна на канцэпцыю кампаніі SpaceX Ілана Маска - Starlink.

Прататыпы Kuiper будуць працаваць на вышыні 590 кіламетраў. Amazon праверыць іх здольнасць злучацца з чатырма тэрміналамі карыстальніка і станцыяй у Тэхасе.

Пасля праверкі наземных тэхналогій кампанія заявіла, што хуткасць яе інтэрнэту складае да 400 Мбіт/с, у той час як Starlink рэкламуе хуткасць ад 100 да 200 Мбіт/с.

Нагадаем, арбітальная групоўка Starlink складаецца з 1789 касмічных апаратаў. Цяпер кампанія SpaceX з'яўляецца найбуйнейшым спадарожнікавым аператарам у свеце.