Беларуская лёгкая прамысловасць ідзе на дно

На складах ляжаць 9-месячныя запасы прадукцыі.

Чыноўнікі дагэтуль называюць лёгкую прамысловасць адным з прыярытэтаў развіцця. Праўда, зараз беларусам даводзіцца канкурыраваць з эканамічнымі монстрамі кшталту Бангладэш, пішуць banki24.by.

Яшчэ ў красавіку кіраўніца верхняй палаты «парламента» Наталля Качанава была ўстурбаваная працай азіяцкіх крам таннага адзення і масавымі пакупкамі шырспажыву праз кітайскія інтэрнэт-крамы тыпу AliExpress.

Качанава распавяла, што ў 2019 годзе імпарт абутку вырас на 26,5%, адзення - на 17%. Са звестак Качанавай, дзель імпартных тавараў на спажывецкім рынку з 2012 года да 2019 год вырасла з 30,6% да 39%. Пры гэтым «асаблівую ўстурбаванасць выклікае рост колькасці гандлёвых крам, якія прадаюць таннае адзенне з азіяцкіх краін».

На думку чыноўнікаў, у крамах, якія гандлююць танным адзеннем з краін Азіі «досыць вялікая частка прадукцыі не адпавядае» патрабаванням тэхнічных рэгламентаў. Таксама ўлады думаюць, што «тавары ў такія крамы раздробнага гандлю могуць быць завезеныя без мытнай ачысткі» і гэта прыводзіць да выпадзення даходаў з бюджэту.

Сёння ёсць статыстыка аб айчыннай лёгкай прамысловасці за 7-8 месяцаў. Можна ацаніць, у якім становішчы знаходзяцца буйныя і сярэднія прадпрыемствы гэтай галіны.

Узровень заробку ў лёгкай прамысловасці з'яўляецца нізкім у дачыненні да сярэдняга ў Беларусі. Лёгкая прамысловасць востра адрэагавала на крызіс 2020 года - з красавіка да ліпеня ў гэтай галіне падалі рэальныя заробкі, хоць агулам у эканоміцы захоўваўся рост. У красавіку, траўні і жніўні даляравыя заробкі ў галіне скарачаліся на 12-13%. У жніўні сярэдні заробак знізіўся да 346 USD. Зразумелая рэч, што медыянны заробак у лёгкай прамысловасці ніжэйшы за 346 USD. У траўні 2020 года медыяна ў галіне была на 14,9% меншая, чым сярэдняя.

Фактычна, беларускія прадпрыемствы ўступілі ў цэнавую канкурэнцыю з вытворцамі самых бедных краін Азіі. Нізкія заробкі дапаўняюцца адтокам кадраў з буйных і сярэдніх прадпрыемстваў.

За 8 месяцаў каэфіцыент замяшчэння ў галіне склаў толькі 71,1%. Гэта значыць, што на кожных 100 звольненых прыпадаў толькі 71 прыняты. У пераліку на людзей за студзень-жнівень лёгкая прамысловасць страціла 3,1 тысячы чалавек. Вытворчыя паказчыкі галіны не выдзяляюцца. За 2/3 года рэальны выпуск знізіўся на 3,9%. Пры гэтым падзенне было паказанае да нізкай базы 2019 года, калі вытворчасць скарацілася на 3,1%.

Лёгкая прамысловасць знаходзіцца ў лідарах паводле сумы складскіх запасаў. На 1 верасня галіна сабрала 760,4 млн BYN нераспраданай прадукцыі, што склала 14,6% усіх запасаў прамысловасці. У параўнанні з аб'ёмам вытворчасці лёгкая прамысловасць мае запасаў на 4,4 месяца бесперапыннай працы - вышэй, чым дзе-небудзь у прамысловасці.

На складах ляжаць 9,5-месячныя запасы абутку, 6,5-месячныя запасы торбаў, 6,3-месячныя запасы скуры, 5,7-месячныя запасы панчошна-шкарпэткавых вырабаў. Сумарная завінавачанасць лёгкай прамысловасці на 1 жніўня дасягнула 2,195 млрд BYN (+5,6% з пачатку года).

Дзель пратэрміноўкі была самай высокай у апрацоўчай прамысловасці - 14,7% (кожны сёмы рубель).