«Баста!»: План дзеянняў на 26 верасня

Пратэсты ўсюды і падрыхтоўка да ўдарнага Маршу 97%.

Тэлеграм-канал «Баста!» і іншыя незалежныя тэлеграм-каналы звярнуліся да беларусаў раніцай, 26 верасня:

– Добрай раніцы, сябры! Сёння прадаўжаем падрыхтоўку да ўдарнага Маршу 97%, які пройдзе ў нядзелю па ўсёй краіне. Днём – ужо традыцыйны Жаночы марш. Увечары – сустракаемся ў дварах і на вуліцах нашых мікрараёнаў і гарадоў.

Жаночы марш

Дзяўчаты прапануюць правесці марш 26 верасня пад лозунгам «Усім нам надакучыў былы – ён больш не легітымны!»

Бярыце кветкі і стужкі!

Дрэс-код: святочны!

14:00 пл. Перамогі!

Партызанскі пратэст паўсюль

Як паказала практыка, супраць лакальных акцый улада няздатная. Мы больш мабільныя і больш арганізаваныя, чым яна. Мы добра ведаем свае гарады, мікрараёны, кварталы. Мы ўжо пазнаёміліся са сваімі суседзямі. Мы стварылі групы Супраціву па ўсёй краіне.

Дамаўляемся з суседзямі – выходзім на вуліцу. Дамаўляемся з калегамі на працы – выходзім на вуліцу. Дамаўляемся ў лакальных чатах – выходзім на вуліцу.

Нас павінна быць відаць па ўсіх гарадах кожны дзень. Выкарыстоўваем усе формы пратэстаў – вулічныя маршы, акцыі ў ВНУ, блакады дарог, канцэрты ў людных месцах, вывешванне сцягоў і транспарантаў.

Марш 97% у нядзелю

Прадстаўнікі групаў Супраціву з мікрараёнаў Менска, ВНУ, а таксама розных гарадоў Беларусі прапанавалі пачаць генеральны наступ на дыктатуру і ў якасці першага кроку – правесці ў нядзелю 27 верасня ў цэнтры нашых гарадоў а 14-й Марш 97%, зрабіць гэтую акцыю найбольш масавай у гісторыі Беларусі. Для гэтага ўсім прыхільнікам пераменаў сканцэнтраваць намаганні на яе падрыхтоўцы, пачаўшы дзейнічаць проста цяпер.

Максімальна распаўсюджваем інфармацыю пра падрыхтоўку Маршу. Інтэрнэт, улёткі, стыкеры, графіці, крэатыўныя заклікі, размовы з суседзямі і калегамі. Запрашаем на Марш усіх усімі даступнымі спосабамі.

Для ключавых кірункаў нашай дзейнасці вельмі важнае асвятленне ў СМІ. Абавязкова паведамляйце нам на @ basta_1bot усю інфармацыю пра пратэсты і страйкі ў вашым горадзе! Дасылайце фота і відэа. Хай уся Беларусь і ўвесь свет даведаюцца пра нашу барацьбу за свабоду.