«Раснафта» спыніла здабычу нафты на Сахаліне

Угода АПЕК+ ударыла па адным з найстарэйшых нафтавых промыслаў у Расеі.

«Раснафта» праз абмежаванні паводле ўгоды АПЕК+ спыніла здабычу нафты на праекце «Сахалинморнефтегаз», гаворыцца ў каментары кампаніі і вынікае са звестак ЦДУ ТЭК, паведамляе finanz.ru.

Так, згодна з бюлетэнем на 29 ліпеня, аб'ём здабычы нафты на гэтым праекце быў нулявым, а сярэднедзёная здабыча ў ліпені склала 2,2 тысячы тон, што на 0,9 тысяч тон ніжэй за ўзровень чэрвеня.

«Неабходнасць выканання Расеяй пагаднення АПЕК+ накладвае на НК «Роснефть» патрабаванні па скарачэнні здабычы нафты, пачынаючы з траўня 2020 года. У сувязі з гэтым кампанія часова абмяжоўвае здабычу нафты на ліцэнзійных участках «РН-Сахалинморнефтегаз». Гэта рашэнне не прадугледжвае вызвалення работнікаў прадпрыемства», - адзначылі ў кампаніі.

Часовыя абмежаванні будуць выкарыстаны для рэалізацыі іншага інфраструктурнага праекта - кампанія разглядае магчымасць будаўніцтва альтэрнатыўнага трубаправода наўзамен зношанага «Оха - Камсамольск-на-Амуры».

«РН-Сахалинморнефтегаз» - адно з найстарэйшых нафтаздабывальных прадпрыемстваў Расеі, заснаванае ў 1928 годзе. Прадпрыемства вядзе сваю дзейнасць на поўначы Сахаліна, з'яўляецца аператарам больш чым па 30 ліцэнзіях на распрацоўку нафтагазавых радовішчаў Сахаліна. У рамках угоды АПЕК+ Расея з траўня павінна скараціць здабычу нафты да 8,5 млн барэляў у дзень - мінімуму з 2002 года. Са жніўня квоты на пагадненне будуць зменшаны, і РФ зможа павялічыць здабычу на 400 тысяч барэляў у дзень.