ЗША анансавалі пагадненне аб абаронным супрацоўніцтве з Польшчай

Пагадненне прадугледжвае павелічэнне ў Польшчы амерыканскіх вайскоўцаў.

Міністэрства абароны ЗША паведаміла аб заканчэнні працы над пагадненнем аб умацаванні абароннага супрацоўніцтва з Польшчай, якое прадугледжвае размяшчэнне ў краіне яшчэ 1000 вайскоўцаў на ратацыйнай аснове ў мэтах стрымлівання Расеі, умацавання NATO і павышэння аперацыйнай і стратэгічнай гнуткасці альянсу, паведамляе «Голас Амерыкі».

Як паведамляецца ў заяве Пентагона, пагадненне адлюстроўвае прынцыпы, выкладзеныя ў Супольных дэкларацыях, якія падпісалі прэзідэнт ЗША Дональд Трамп і прэзідэнт Польшчы Анджэй Дуда ў 2019 годзе. Напрыклад, яно забяспечвае неабходную прававую базу, інфраструктуру і справядлівае размеркаванне цяжару, неабходныя для паглыблення абароннага супрацоўніцтва паміж дзвюма краінамі.

Пагадненне плануецца падпісаць 15 жніўня, у Дзень польскага войска і стагоддзя Варшаўскай бітвы, паведамляе польская штодзённая газета Dziennik Gazeta Prawna. Падпісанне адбудзецца ў гэты дзень пры ўмове, што не пагоршыцца эпідэміялагічная сітуацыя.

Паводле звестак газеты, у найбліжэйшыя некалькі месяцаў або цягам года ў Польшчы будуць размешчаныя не менш за 1 000 амерыканскіх жаўнераў у дадатак да 4 500 вайскоўцаў, ужо дыслакаваных у гэтай краіне.