Для бюджэтнікаў у Беларусі ўвялі новыя змены ў заробках

Студзеньскія заробкі могуць быць ніжэйшыя за снежаньскія.

Улады ўвялі чарговае змяненне для работнікаў бюджэтных арганізацый. Адно з новаўвядзенняў - аднаразовыя выплаты на аздараўленне для гэтых работнікаў вызвалілі ад выплаты падаходнага падатку. Новаўвядзенні прадугледжаны ўказам Лукашэнкі «Аб падаткаабкладанні» №503, паведамляе tut.by.

З 1 студзеня 2020 года ўлады вызвалілі ад падаходнага падатку аднаразовыя выплаты на аздараўленне, якія атрымліваюць работнікі бюджэтных арганізацый адзін раз у каляндарным годзе, як правіла, пры сыходзе ў працоўны адпачынак. Гэта значыць бюджэтнікі цяпер будуць атрымліваць поўную аднаразовую дапамогу на аздараўленне да адпачынку, выплачваць падаходны падатак з гэтых грошай не трэба.

Гэтую дапамогу выплачваюць як тым работнікам, якія атрымліваюць заробак з бюджэтных сродкаў, так і тым, каму плацяць з даходаў ад пазабюджэтнай дзейнасці. Для другіх увялі яшчэ адно змяненне. З 1 студзеня аднаразовую выплату (дапамогу) на аздараўленне ўключаюць у затраты вытворчасці і рэалізацыі пры вылічэнні падатку на прыбытак.

Да змен выдаткі на аднаразовую дапамогу на аздараўленне для бюджэтнікаў уключалі пры падаткаабкладанні ў іншыя нармаваныя выдаткі. На іх можна было выдаткаваць да 1% ад даходу ад рэалізацыі тавараў і паслуг, даходаў ад арэнды і маёмасных правоў.

Гэта значыць аднаразовыя выплаты на аздараўленне бюджэтнікам з 1 студзеня гэтага года ўлічваюцца пры падаткаабкладанні прыбытку без абмежаванняў. Дзякуючы гэтаму бюджэтнікам змогуць павысіць выплаты на матэрыяльную дапамогу на аздараўленне.

Якія яшчэ змены ўвялі з 1 студзеня для бюджэтнікаў

Для бюджэтнікаў з 1 студзеня ўвялі новую схему разліку заробкаў. Адна з асноўных змен: тарыфную стаўку першага разраду замянілі на базавую стаўку. Улады раней запэўнівалі, што праз новую схему падзення заробкаў не павінна адбыцца, але без уліку прэмій.

У Міністэрстве працы раней растлумачылі, чаму студзеньскія заробкі ў некаторых выпадках могуць быць ніжэйшыя за снежаньскія. Пры параўнанні заробкаў за снежань і студзень чыноўнікі не будуць улічваць шматлікія даплаты, якія працаўнікі могуць атрымаць у апошні месяц года. Да прыкладу, начныя змены, сумяшчэнне, замена часова адсутнага работніка, за звышурочную працу, за выхад у выходныя і святы. Калі ад снежаньскага заробку адабраць усе гэтыя даплаты, то ў студзені заробкі не будуць ніжэйшыя, чым месяцам раней.

13 снежня Лукашэнка заявіў, што «разбярэцца з усімі», хто ўносіў прапановы ў змене схемы выплаты заробкаў бюджэтнікам, калі хтосьці атрымае «на рубель менш» пры такой жа нагрузцы, як цяпер.

У бюджэце на 2020 год прадугледжаны фонд аплаты працы, які забяспечвае сярэднегадавое павышэнне заробкаў у бюджэтнай сферы не менш чым на 10% у параўнанні з 2019 годам, удакладняюць у Міністэрстве працы.

Улады абяцаюць бюджэтнікам прыкметны рост заробкаў. У 2020 годзе сярэдні заробак бюджэтнікаў павінна перавысіць 920 рублёў, паведаміў раней міністр фінансаў Максім Ермаловіч. З ягоных слоў, у першую чаргу паскоранымі тэмпамі ўлады будуць падымаць заробкі медыкаў, настаўнікаў і нізкааплатных работнікаў.

Улады з 1 студзеня 2020 года таксама дазволілі выканкамам ствараць адмысловыя цэнтры, у якія будуць пераводзіць некаторых работнікаў бюджэтных арганізацый. Яны будуць выконваць тую ж працу, што і раней, але ўжо працуючы ў новым цэнтры. Сярод іх - бухгалтары, фінансісты, кіроўцы, спецыялісты ў рамонце. З тымі, хто адмовіцца пераходзіць у новыя цэнтры, будуць касаваць дамовы. Змены прадугледжаныя прэзідэнцкім указам №475 «Аб забеспячэнні дзейнасці бюджэтных арганізацый».