Якія маркі падзялілі паміж сабой беларускі аўтарынак

Аўтадылеры асцерагаюцца, што 2020 год ужо не будзе такім вясёлкавым.

Дылеры могуць паціраць рукі паводле вынікаў 2019 года: беларусы набылі ў аўтасалонах 64 500 новых легкавых аўтамабіляў, пабіўшы ўсе папярэднія рэкорды. Нагадаем, у 2018 годзе было прададзена 52,8 тысячы новых аўто. Tut.by паглядзеў, якія маркі былі самымі папулярнымі.

Geely Atlas у асабістым заліку ўвайшоў у тройку самых папулярных аўто - за год уладальнікамі беларускага красовера сталі 3320 чалавек. А яго субрат Emgrand X7 імкліва ўбраўся ў сілу - з 500 машын у 2018 годзе да 2237 у мінулым. Гэта дазволіла яму замкнуць дзясятку самых прадаваных аўто. На другім месцы размясціўся Volkswagen Polo седан з вынікам 5804 аўто. І першае месца займае Lada Vesta. Сіламі двух імпарцёраў за 2019 год было прададзена 7585 машын.

У першай пяцёрцы самых прадаваных марак невялікія змены. Lada ўсё ж выйшла на першае месца, ссунуўшы з першай прыступкі Renault - 16 281 прададзены аўтамабіль супраць 11 370. З такім вынікам Lada займае 27% рынку. Volkswagen застаўся на трэцім месцы з паказчыкам 7258 аўто і адхапіў 12% рынку. Geely, нягледзячы на амаль двухразовы прырост продажу ў параўнанні з мінулым годам, па-ранейшаму на чацвёртым месцы з вынікам 6894 аўто. Але адставанне ад трэцяга месца не такое вялікае. Паколькі завод дамовіўся з банкамі на падаўжэнне ільготных умоў крэдытавання, то ёсць шанец заскочыць у наступным годзе на п'едэстал гонару. Тым больш, у гаме з'явіцца яшчэ адна мадэль красовера, якая павінна прыцягнуць новых пакупнікоў.

Калі глядзець на дынаміку рынку, то продажы пачалі плыўна расці са студзеня да сакавіка. Пікавым стаў красавік, калі было прададзена 6210 аўто. Аж да снежня назіраўся невялікі спад, а ў апошні месяц года продажы зноў падскочылі, паказаўшы вынік 6017 аўтамабіляў. Гэта можна растлумачыць актыўнасцю дылераў, якія наперабой прапаноўвалі нябачаныя зніжкі і прыцягвалі распродажамі.

Аўтадылеры асцерагаюцца, што 2020 год ужо не будзе такім вясёлкавым. Зрэшты, і краху рынку ніхто не прадракае. Будзе цікава паназіраць за маркай Ravon, якая абяцае прадаць у Беларусі не менш за 5 тысяч аўто за гэты год. Вернецца і прытармозіць працу кітайскі Lifan. Так што барацьба за рынкавы пірог сёлета павінна разгарнуцца неабыякая.