Памочнік Зяленскага дапусціў, што ўкраінскі лятак маглі збіць наўмысна
- 14.01.2020, 17:55
- 11,014
Праца адмысловай камісіі прадаўжаецца.
Нягледзячы на прызнанне іранскім бокам самога факта знішчэння летака і заявы пра тое, што гэта адбылося ў выніку памылкі, следчым трэба ўстанавіць, ці сапраўды гэта было ненаўмысна.
Пра гэта памочнік прэзідэнта Уладзіміра Зяленскага Андрэй Ярмак заявіў «Украінскай праўдзе».
«Было некалькі версій, версія ракеты была адной з асноўных з самага пачатку. Менавіта таму туды паехалі нашы людзі, каб на месцы вывучыць усе абставіны і ўстанавіць факты.
Хачу адзначыць, што нягледзячы на прызнанне іранскім бокам самога факта знішчэння і заявы пра тое, што гэта адбылося ў выніку трагічнай памылкі, нам яшчэ трэба будзе ўстанавіць, ці было гэта памылкай ці ўсё ж намерам».
Ярмак дадаў, што менавіта таму праца камісіі прадаўжаецца.
Таксама памочнік прэзідэнта паведаміў, што найбліжэйшымі днямі ва Украіну павінен прыбыць прадстаўнік Ірана.