Лукашэнка назваў «хламам» вышэйшую матэматыку ў ВНУ
119- 2.09.2019, 19:00
- 75,009
Дыктатар таксама заявіў, што яму цяжка было вучыцца ў школе.
2 верасня падчас размовы са старшакласнікамі СШ №93 Менска Аляксандр Лукашэнка паразважаў пра тое, якія прафесіі могуць быць запатрабаваныя ў будучыні. Ён параіў хлопцам і дзяўчатам спакойна вучыцца і чакаць, калі выявяцца «здольнасці да чагосьці», і не ставіць перад сабой недасягальных мэтаў. Не раіў ён усім імкнуцца ў IT-сферу. Сказаў, што захапляецца прафесіяй механізатара.
Лукашэнка прызнаўся, што яму, «чалавеку вясковаму», было цяжкавата ў школе. А потым ён павінен быў «перавучвацца... адукацыю новую атрымліваць» на эканамічным факультэце.
«Шмат там «хламу» было, я ўжо цяпер як прэзідэнт гэта прыбіраю ў ВНУ, шмат непатрэбнага, - цытуе словы Аляксандра Лукашэнкі sb.by. - Напрыклад, вышэйшая матэматыка. Трэба разумець, што гэта такое, але так глыбока даваць яе...»
Са слоў дыктатара, вышэйшая матэматыка «ў такім аб'ёме» яму не спатрэбілася ні падчас працы ў сельскай гаспадарцы, ні ў прамысловасці. «Але мы ж усё адно ўбіваем чалавеку ў галаву гэтую вышэйшую матэматыку, - абураецца Лукашэнка. - Калі ты матэматык, фізік і іншае - гэта трэба. Таму я настойваю: не трэба, каб шпігавалі дзяцей у школе адзінаццаць гадоў усім і ўсімі. Трэба даць базу, каб яны маглі вызначыцца, чым займацца далей».