Пілот «Белавія» выратаваў самалёт на перагружанай паласе аэрапорта ў Амстэрдаме

Відавочца ацэньвае дзеянні пілота як гераічныя.

Чытач nn.by паведаміў аб няштатнай сітуацыі з самалётам «Белавія» ў Амстэрдаме, сведкам якой ён стаў, і ацэньвае дзеянні пілота як гераічныя.

«У чацвер, 22 жніўня, ляцелі з сям'ёй з Менска ў Амстэрдам. Я так разумею, іх аэрапорт быў моцна перагружаны: першы раз такое бачыў проста ў ілюмінатар, каб побач на пасадку заходзілі самалёты настолькі блізка. Мы ўжо садзіліся, шасі закранулі паласу і паехалі, але потым самалёт зноў набраў хуткасць і ўзляцеў, селі з другога разу.

Як патлумачыла каманда, калі я правільна зразумеў, хто-небудзь з тых, хто сядаў перад намі, ці то не паспяваў ад'ехаць, ці то разгарнуцца, і была рызыка сутыкнення, таму мы пайшлі на другое кола.

Усе пасля прызямлення хацелі паціснуць руку пілоту, я таксама падзякаваў», - распавёў Аляксей.

Звесткі FlightRadar'a пацвярджаюць гэты аповед: відаць, што самалёт ужо пачаў тармазіць, але пасля кароткага тармажэння зноў пайшоў на ўзлёт.

У «Белавія» журналістам пацвердзілі, што самалёту давялося ўзляцець праз тое, што на паласе заставаўся іншы самалёт.

«Пасадка рэйса B2 867 Менск-Амстэрдам праходзіла ў штатным рэжыме пад поўным кантролем дыспетчараў аэрапорта Схіпхол, - гаворыцца ў каментары «Белавія». - Аднак пры пасадцы пілотам была дадзеная каманда сысці на другое кола праз не вызваленне паласы іншым паветраным суднам. Экіпаж дзейнічаў у адпаведнасці з інструкцыяй дыспетчараў, палёт праходзіў у штатным рэжыме і ў адпаведнасці з правіламі бяспекі палёту. Бяспека пасажыраў, экіпажа і паветранага судна была забяспечаная цалкам. Інфармацыя пра прычыны заходу на другое кола была даведзеная камандзірам паветранага судна пасажырам праз гучную сувязь».