Пад Менскам за $300 тысяч прадаюць дом з сядзібы Чапскага

Дом размешчаны ў аграгарадку Прылукі.

У аграгарадку Прылукі каля сталіцы прадаюць будынак, які ўваходзіць у склад сядзібы знакамітага мэра Менска графа Чапскага. Аб'ява аб продажы размешчаная на пляцоўцы «Куфар Нерухомасць». Кошт лота плошчай амаль 750 квадратных метраў - блізу 606,7 тысячы рублёў, або дзесьці 300 тысяч даляраў, піша tut.by.

Будынак на продаж размяшчаецца ў сядзібе Чапскага 19 стагоддзя за сем кіламетраў ад колавай дарогі. Збудаванне размешчанае на пляцы 64 соткі ўздоўж берага ракі Пціч і недалёка ад слуцкай трасы, што дасць магчымасць стварыць тут, напрыклад, аграсядзібу. Выглядае яно вось так:

У 2015 годзе будынак рэканструявалі і правялі ваду, электрычнасць, каналізацыю, газ, тэлефон і інтэрнэт.

У аб'яве таксама паззначана, што збудаванне падыдзе і пад вытворчую базу, а наяўнасць складскіх памяшканняў агульнай плошчай блізу 300 квадратных метраў дазволіць захоўваць усё патрэбнае.

Нагадаем, Чапскі быў мэрам Менска ў канцы 19-га - пачатку 20-га стагоддзя. Пры ім у горадзе з'явілася конка, паўнавартасны водаправод і ліхтарнае асвятленне. Акрамя таго, Чапскі быў заснавальнікам менскага піўзавода - цяперашняй «Аліварыі».