20 жнiўня 2019, aўторак, 22:57
Мы ў адной лодцы
Рубрыкі

Беларусцы, якая адпрацавала 31 год, прызначылі пенсію троху большую за «мінімалку»

52
Беларусцы, якая адпрацавала 31 год, прызначылі пенсію троху большую за «мінімалку»

Улады эканомяць на ветэранах.

Пенсіянерка з Гародні са стажам працы 31 год атрымлівае пенсію троху большую за мінімальную працоўную пенсію. Жанчына за ўсю працоўную дзейнасць працавала на розных спецыяльнасцях, атрымала званне «Ветэранка працы», піша newgrodno.by.

Феліцыі сёння 71 год. Жанчына адвучылася ў Краснадары на бухгалтарку, усё жыццё пражыла ў Гародні, нарадзіла 4 дзяцей. Цяпер на пенсіі паводле ўзросту. Першы час і на пенсіі працавала, але ўжо не дазваляе здароўе.

– Яшчэ два гады таму я старалася недзе падпрацоўваць, таму што пенсія ў мяне вельмі маленькая. А цяпер дапамагаю з унукамі.

За жыццё я памяняла шмат прафесій. Працавала чысцільшчыцай на бавоўнапрадзільнай фабрыцы, машыністкай сектара падрыхтоўкі і выпуску матэрыялаў у статыстыцы фінансаў, аператаркай статыстычнай управы Гарадзенскай вобласці, інспектаркай у лімітах на нафтабазе. Вось гэта была любімая праца.

Давялося сысці, таму што не было каму глядзець дзяцей. Потым выйшла рахаўнічкай і бухгалтаркай. Усе добрыя вакансіі даводзілася кідаць, таму што не было каму дапамагаць з выхаваннем дзяцей. Калі дзеці падраслі, выйшла працаваць гардэробніцай у радзільню, потым уладкавалася на фабрыку мастацкіх вырабаў вышывальніцай. Апошнія 17 гадоў прапрацавала медрэгістратаркай. Заробак быў невялікі, вось і пенсія цяпер маленькая, – дзеліцца пенсіянерка.

Памер пенсіі паводле ўзросту павінен складаць не менш за 55% ад сярэднямесячнага заробку пенсіянера, але не менш за памер зацверджанага заканадаўствам мiнiмальнага памеру пенсіі.

Велічыня працоўнай пенсіі паводле ўзросту залежыць ад памераў мінулага заробку.

На сёння мінімальны памер пенсіі паводле ўзросту складае 56,01 рубля (25 адсоткаў бюджэту пражытковага мінімуму ў сярэднім на душу насельніцтва). Таксама прадугледжаная даплата да мінімальных памераў пенсій 173,04 рубля (20 адсоткаў сярэдняй заработнай платы, якая ўжываецца для карэктавання фактычнага заробку пенсiянера пры прызначэннi i пераразліку працоўных пенсій).

Мінімальны памер пенсіі паводле ўзросту з улікам даплаты складае 229,05 руб – 113 даляраў.

Феліцыя атрымлівае ненашмат больш і наракае, што сусед усю маладосць правёў у турме і атрымлівае на пару рублёў менш:

– Я ўсё жыццё працавала, страчвала добрую працу, таму што дзяржава не давала магчымасцяў аддаць дзяцей у дзіцячы сад. Вядома, у апошнія гады заробак у мяне быў маленькі. Атрымліваецца, трэба было сябе глядзець, а я аддала 4 жыцці, спраўна плаціла падаткі. Раней дастаткова было і 5 гадоў працы, каб атрымаць працоўную пенсію, вось і атрымалася, што паміж мной і чалавекам, які прапрацаваў гадоў 5–10 і то ў апошнія гады перад пенсіяй, вёў амаральны лад жыцця, няма ніякай розніцы.

Таксама Феліцыя сцвярджае, што ёй не ўлічылі 0.5 стаўкі, а толькі стаўку, калі яна працавала паводле сумяшчальніцтва на паўтары стаўкі. Сёння яна нікому нічога не можа даказаць.

– Мы звярталіся ў Фонд сацыяльнай абароны насельніцтва. Мае паперы некалькі разоў паднімалі і сказалі, што ўсё палічана правільна, пенсія невялікая, таму што заробак быў маленькі. Прапанавалі звярнуцца па матэрыяльную дапамогу, як маламаёмных. Мы сабралі дакументы, звярнуліся. Так выдалі рубля паўтара. І гэта матэрыяльная дапамога на год. Яшчэ і стаўленне, як быццам я злачынца нейкая, – кажа жанчына.

У ФСАН Кастрычніцкага раёна Гародні растлумачылі, што Феліцыя працавала на паўтары стаўкі паводле сумяшчальніцтва. Заробак, які грамадзянка атрымлівала на асноўным месцы працы і праз сумяшчальніцтва, сумуецца і ўлічваецца пры вызначэнні індывідуальнага каэфіцыента. А вось стаж у падвойным памеры не бярэцца. Калі вы адпрацавалі паўгода ў двух месцах адначасова, у любым выпадку залічваецца 6 месяцаў, а не год.

Беларусы, якія не здолелі напрацаваць патрэбны для атрымання працоўнай пенсіі страхавы стаж, могуць аформіць сацыяльную пенсію: мужчыны – з 65 гадоў, жанчыны – з 60 гадоў. Памер сацыяльнай пенсіі складае 50% ад бюджэту пражытковага мінімуму. БПМ – 224.02 руб.

Да 2014 года страхавы стаж складаў 5 гадоў, каб атрымаць права на працоўную пенсію. А з 1 студзеня 2014 года яго павялічылі да 10 гадоў, праз год – да 15 гадоў. У 2016 годзе ён ужо складаў 15 гадоў і 6 месяцаў. З пачатку гэтага года страхавы стаж паднялі яшчэ на паўгода, цяпер ён складае 17 гадоў. Штогод гэтая планка будзе павялічвацца на 6 месяцаў і ў 2025 годзе складзе 20 гадоў.