«Не здаў грошы - дзіця няхай ідзе са школы?»
18- 27.05.2019, 15:14
- 25,722
Як выглядае «добраахвотная» дабрачыннасць у беларускіх школах.
Чытач ex-press.by напісаў у рэдакцыю пра праблему «добраахвотнай» дабрачыннасці ў барысаўскай школе.
«Перагібы ў сістэме адукацыі даўно ўжо не сыходзяць з языка ў людзей. Таму хачу прапанаваць да апублікавання такую навіну, дасланую мне маёй знаёмай, дзіця якой вучыцца ў адной з устаноў адукацыі Барысава, - напісаў у рэдакцыю барысавец.
- Калі шчыра, яна адразу ж выклікала ў мяне справядлівае абурэнне - так, патрэбная дабрачыннасць, гэта высакародная справа. Але ўсякая справа з-пад палкі ператварае самыя добрыя пачынанні ў абсурд, і гэта неабходна спыняць пад корань.
У прынцыпе, уся навіна змяшчаецца ў прымацаваным скрыншоце, які змяшчае перапіску ў мэсэнджары ў чаце бацькоўскай групы адной з устаноў адукацыі Барысава, прачытаўшы якую хочацца сказаць: вось такая ў барысаўскіх школах «добраахвотная дабрачыннасць» - выцісканне грошай з бацькоў, з-пад палкі:
Настаўніка, які не сабраў грошай і «не ўмее працаваць з бацькамі» - у расход! Асабліва абураюць фразы, якія піша чалец апякунскай рады (і яна ж, мабыць, кіраўніца бацькоўскага камітэта аднаго з класаў), цытую: «Я разумею, мы можам абурацца, што павінна дзяржава або аддзел адукацыі, але мы гэтым нічога не даможамся, а настаўніка моцна падставім!»
Або вось яшчэ перл: «Настаўнік у нас вельмі просты ў гэтым плане, не патрабуе, намякае, просіць. Я ведаю, ёсць і іншыя, якія пытанне ставяць жорстка». Хочацца спытаць, жорстка - гэта як? Не здаў грошы - дзіця выгнаць са школы? Да чаго яшчэ дойдзе гэты тэатр абсурду ў нашай «народнай» сістэме адукацыі?!...»
Ліст чытача каментуе юрыст Алег Мацкевіч:
- Існыя на сённяшні дзень нарматыўныя акты ў выглядзе пастаноў Міністэрства адукацыі рэгулююць пытанні, звязаныя з дзейнасцю бацькоўскіх камітэтаў школы і апякунскіх камітэтаў школы. Прыцягненне грашовых сродкаў для забеспячэння дзейнасці ўстаноў адукацыі выведзенае з кампетэнцыі працы бацькоўскіх камітэтаў школы і знаходзіцца цалкам у вядзенні апякунскіх радаў.
Адпаведна, можна казаць аб тым, што ўсе спробы арганізацыі збору грашовых сродкаў, нават без удзелу ў іх непасрэдным акумуляванні, з'яўляюцца з боку іншых органаў і ініцыятыўных груп незаконнымі. Тым больш, яны з'яўляюцца незаконнымі, улічваючы прымусовы парадак здачы грашовых сродкаў на патрэбы школы.
У выпадках, калі асобныя бацькі, альбо прадстаўнікі ўстановы адукацыі, якія не маюць адпаведных паўнамоцтваў, альбо якія дзейнічаюць з перавышэннем наяўных паўнамоцтваў, парушаюць заканадаўства ў частцы прыцягнення грашовых сродкаў для забеспячэння дзейнасці школы, варта звяртацца са скаргамі да кіраўніцтва школы, тэрытарыяльныя органы Міністэрства адукацыі, пракуратуру.