«Ператварылі «БелАМА» ў прыватную краму і гналі замовы міма завода»

За што маглі затрымаць гендырэктара Вячаслава Бурскага.

Чуткі пра затрыманне гендырэктара прадпрыемства «БелАМА», якое выпускае вайсковыя аптычныя прыцэлы і сістэмы навядзення, з'явіліся яшчэ на мінулым тыдні, піша kp.by. Пра гэта распавялі супрацоўнікі завода. Аднак у прыёмнай гендырэктара да гэтага часу захоўваюць маўчанне. Нічога пакуль афіцыйна не каментуе ні Следчы камітэт, ні Камітэт дзяржаўнай бяспекі. Аднак журналістам удалося высветліць некаторыя падрабязнасці.

- Вячаслава Аляксандравіча затрымлівалі ў Расеі, справай займаецца КДБ Беларусі, - паведаміла крыніца на прадпрыемстве. - На прадпрыемстве ўжо тыдзень працуюць следчыя - яны адбіраюць дакументацыю за апошнія дзесяць гадоў працы завода.

Цяпер па краіне пракацілася хваля затрыманняў чыноўнікаў. Выстаўленыя абвінавачанні - атрыманне хабараў. Ці ёсць імавернасць, што Вячаслаў Бурскі трапіў у гэтую ж «хвалю»? Крыніца упэўненая, што прэтэнзіі следчых ніяк не звязаныя з атрыманнем або дачай хабару. Паводле яе слоў, справа тычыцца эканамічных злачынстваў:

- Калі казаць коратка, то кіраўніцтва прадпрыемства ператварыла «БелАМА», фактычна, у прыватную краму, і гнала заказы міма завода, - распавяла «Комсомолке» крыніца.

На сайце «БелАМА» Вячаслаў Аляксандравіч дагэтуль пазначаны як гендырэктар прадпрыемства. Аднак з некаторых звестак, ужо некалькі тыдняў выканаўцам абавязкаў кіраўніка «БелАМА» з'яўляецца яго першы намеснік - Аляксандр Мароз.

Сваю працу на заводзе Вавілава Вячаслаў Бурскі пачаў яшчэ ў 1970 годзе простым інжынерам. Пазней працаваў галоўным тэхнолагам, галоўным інжынерам. У 1992 ён узначаліў прадпрыемства і на пасадзе дырэктара ўжо цэлых 27 гадоў. Да гэтага моманту ён з'яўляецца доктарам тэхналагічных навук, прафесарам. У 2008 годзе з рук Лукашэнкі Вячаслаў Бурскі атрымаў ордэн Айчыны III ступені, а некалькі гадоў таму - ордэн Айчыны II ступені.

«БелАМА» вырабляе прыборы навядзення для танкаў, БМП, аптычныя і каліматорныя прыцэлы для стралковай зброі, прыборы начнога бачання.

Беларускае оптыка-механічнае аб'яднанне («БелАМА») спецыялізуецца на распрацоўцы і выпуску оптыка-электронных, лазерных і оптыка-механічных прылад. Асноўны кірунак - вайсковая прадукцыя. «БелАМА» вырабляе прыборы навядзення для танкаў, БМП, аптычныя і каліматорныя прыцэлы для стралковай зброі, прыборы начнога бачання, лазерныя тэлеўказальнікі, цеплавізары і іншую аптычную прадукцыю для вайскоўцаў.