«Сталі здаваць нервы ў старшыняў камісій»

Незалежныя назіральнікі фіксуюць сотні парушэнняў.

Апошні дзень перадвыбарчай агітацыі 16 лістапада апынуўся самым насычаным на падзеі.

Пакуль ля Камароўскага рынку танцавалі прыхільнікі праўладных партый, на прадстаўнікоў дэмакратычных сіл чыноўнікі ў выбарчых камісіях выклікалі міліцыю, паведамляе «Белсат».

«Мы толькі што з міліцыі. Сталі здаваць нервы ў старшыняў камісіяў: на нашага назіральніка старшыня проста так узяла і выклікала міліцыю, што ён «п'яны». Прыехала міліцыя, завезла ў аддзел на экспэртызу, якая ўстанавіла, што ён цвярозы», - кажа каардынатар кампаніі «Права выбару» Аляксандар Сілкоў.

За час датэрміновага галасавання назіральнікі ад апазіцыйных партый зафіксавалі больш за 350 фактаў парушэння выбарчага заканадаўства, прынамсі, 16 дэмакратычных кандыдатаў знялі з «выбараў», дзясятак пазбавілі магчымасці выступіць на дзяржаўным радыё і тэлевізіі.