Новае пакаленне павінна адказаць Лукашэнку

Моладзевы лідар заклікаў сустрэцца на Кастрычніцкай плошчы 15 лістапада.

Моладзевы лідар Арсень Дзядок, які выступіў на плошчы Свабоды падчас абмеркавання фільма «Лукашэнка. Крымінальныя матэрыялы», звярнуўся да сваіх аднагодкаў, паведамляе прэс-служба грамадзянскай кампаніі «Еўрапейская Беларусь»

- Дарагія сябры, 8 лістапада мы прыйшлі, каб паказаць тое, што беларуская моладзь ёсць, - заявіў актывіст. - І мы гэта паказалі.

Таксама, мы паказалі, што Беларусь стамілася. Стамілася ад таго, што ўжо 25 гадоў у краіне няма зменаў. 25 гадоў мы не можам уплываць на лёс сваёй краіны. Чвэрць стагоддзя.

Калі за гэты час нашы суседзі змаглі ўмацаваць свой суверэнітэт і стаць эканамічна незалежнымі, то ў Беларусі ўсур'ёз абмяркоўваюцца варыянты інкарпарацыі ў склад Расеі. Налета адбудуцца прэзідэнцкія выбары. І Лукашэнка ўжо вызначыў, што пойдзе на сёмы прэзідэнцкі тэрмін. І мы - новае пакаленне - павінны рашуча адказаць на гэта.

Не - саюзу з Расеяй!

Не - сёмага тэрміну Лукашэнкі!

Нам трэба дзейнічаць смела і рашуча. 15 лістапада, 18:00, Кастрычніцкая плошча. Чакаю вас, бо разам мы сіла і мы абавязкова пераможам!