«Белсат»: Цяжка знайсці беларуса, які б не чытаў «Хартыю»

Сюжэт тэлеканала «Белсат» да 20-годдзя сайта Charter97.org.

Не перастае расці ціск на нашых калег з сайта Charter97.org, які адзначае 20-гадовы юбілей. За 20 гадоў чаго толькі не было: і блакаванне, і вымушаная эміграцыя, і загадкавая смерць заснавальніка сайта Алега Бябеніна напярэдадні прэзідэнцкіх выбараў 2010 года. Аднак «Хартыя» выжыла, а папулярнасць сайта толькі расце, прычым не толькі ў Беларусі, але і за яе межамі, гаворыцца ў сюжэце Вітаўта Сіўчыка на тэлеканале «Белсат».

Да «Хартыі-97» ставяцца па-рознаму: хтосьці вінаваціць сайт у тэндэнцыйнасці, а хтосьці ўпэўнены, што гэта адное з апошніх медый, непадкантрольных КДБ. У кожным выпадку цяжка знайсці беларуса, які карыстаўся б інтэрнэтам і ніколі не чытаў гэтыя старонкі.

Жыхары Гомеля:

- Навіны даволі цікавыя. І з якога боку яны паказаны таксама мне падабаецца.

- Ёсць, вядома, хібы ў кожнага сайта, але, мне здаецца, на «Хартыі» гэта занадта аднабока паказваюць.

- Вельмі шмат інфармацыі, той, якой няма ў афіцыйных крыніцах. Я магу ўзяць і прачытаць тое, што адбываецца цяпер у Беларусі.

- Падабаецца тым, што там кажуць праўду.

Сёння «Хартыя-97» адзначае свой 20-ы дзень нараджэння, і, як відаць, за гэты час рэдакцыі ўдалося павялічыць колькасць сваіх чытачоў.

Сюжэт пра «Хартыю-97» з 11:10:

Галоўная рэдактарка сайта Наталля Радзіна кажа:

- Да блакавання Charter97.org чытала палова дарослага насельніцтва Беларусі, за апошнія некалькі месяцаў у сайта было блізу 4 мільёнаў унікальных наведвальнікаў з нашай краіны.

Блакаванне, пра якое згадвае Наталля Радзіна, доўжыцца ўжо амаль 8 месяцаў. Гэта самая доўгачасовая забарона апазіцыйнага рэсурсу, але не адзіная. «Хартыю-97» ужо блакавалі ў разгар палітычнай барацьбы, падчас прэзідэнцкіх выбараў 2001 і 2006 гадоў. Узломвалі пасля Плошчы-2010.

Лідар Беларускага Нацыянальнага Кангрэсу Мікалай Статкевіч сцвярджае:

- «Хартыя» небяспечная, бо яна ўплывае. «Хартыя» не абыходзіць, у адрозненні ад большасці СМІ, той ганебны юрыдычны факт, што Беларусь - гэта адзіная краіна ў Еўропе, дзе ўлада кантралюецца незаконнай злачыннай групоўкай на чале з былым прэзідэнтам краіны.

Рэдакцыі сайта за сваю пазіцыю давялося заплаціць высокую плату. За 3,5 месяца перад так званымі прэзідэнцкімі выбарамі 2010 года заснавальніка і першага кіраўніка сайта Алега Бябеніна знайшлі павешаным на сваім лецішчы. Ні цыдулкі, ні паведамлення рэдактар не пакінуў. Следства вынесла свой вердыкт - самагубства. Калегі ўпэўненыя: Алега Бябеніна забілі, тым самым аслабіўшы каманду кандыдата ў прэзідэнты Андрэя Саннікава.

- Калі Алега знайшлі, на яго целе былі гематомы, у яго была сцёртая скура на костачках пальцаў. Ён быў без лінзаў, без акуляраў, хоць зрок -10, гэта значыць чалавек фактычна нічога не бачыў. Ён не мог сам кроку ступіць, - кажа Наталля Радзіна.

Пры разгоне Плошчы-2010 галоўную рэдактарку Наталлю Радзіну збілі і больш чым на месяц пасадзілі ў засценкі КДБ. Пазней уся рэдакцыя пераехала ў Варшаву. Пасля вірлівых пратэстаў 2017 года ўлады ў Беларусі блакаваннем наважылі мінімізаваць уплыў «Хартыі-97». Між тым, новая пагроза сайту прыйшла з іншага боку. Міжнародныя фонды, закліканыя падтрымліваць дэмакратыю і правы чалавека, адмаўляюцца фінансаваць інтэрнэт-рэсурс.

- Фонды ідуць у нагу з еўрапейскімі чыноўнікамі, якія сёння цалуюцца з дыктатарам Лукашэнкам. Але гэта вельмі недальнабачная палітыка, якая прывядзе да катастрафічных наступстваў, - упэўненая Наталля Радзіна.

Сёння сайт звяртаецца па матэрыяльную дапамогу да сваіх прыхільнікаў і чытачоў. Рэквізіты можна знайсці на старонках Charter97.org.

АХВЯРАВАННЕ ПРАЗ PAYPAL:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка:Bank Millennium S. A.

Адрас: ul. Stanislawa Zaryna, 2A, 02-593, Warszawa

IBAN: PL 97 1160 0000 2202 0002 1671 1123

SWIFT: BIGBPLPW

Імя ўладальніка рахунку: Fundacja «KARTA '97»

Прызначэнне аплаты: Darowizna na cele statutowe

Звязацца з намі можна праз адрас [email protected]