Пятрас Аўштравічус: Менск успрыняў зняцце санкцый няправільна

Еўразвяз не павінен паўтараць памылак у стасунках з Лукашэнкам.

Пра гэта еўрадэпутат ад Літвы Пятрас Аўштравічус заявіў на пленарным пасяджэнні Еўрапарламента ў Страсбургу:

«Сітуацыя ў Беларусі не мяняецца. Старыя праблемы не развязваюцца. Так званыя "выбары" былі сфальсіфікаваныя. Ужываецца смяротнае пакаранне. Незалежныя СМІ пераследуюцца і блакуюцца.

А Еўрапейскі Звяз у гэты час прадаўжае рабіць памылкі ў стасунках ЕЗ – Беларусь. Два гады таму, калі знялі частку санкцый, Менск успрыняў гэта як няправільны сігнал. Мы не маем права паўтараць старыя памылкі пры перамовах аб Усходнім партнёрстве.

Стасункі з Беларуссю не могуць грунтавацца толькі на жаданні Еўропы прапаноўваць фінансавую дапамогу на развіццё гандлю. Наша палітыка павінна быць строга абумоўленая выкананнем правоў чалавека.

Астравецкая АЭС – гэта прамая пагроза бяспекі для ўсіх еўрапейцаў», – заявіў Пятрас Аўштравічус.

Нагадаем, што Еўрапейскі парламент на пасяджэнні ў чацвер у Страсбургу прыняў рэзалюцыю пра сітуацыю ў Беларусі.

У рэзалюцыі выказваецца шкадаванне з нагоды пераследу ў Беларусі незалежных журналістаў і СМІ падчас мясцовых выбараў і прыводзіцца прыклад з блакаваннем інфармацыйнага партала «Хартыя-97» і збіццём журналіста тэлеканала «Белсат» Андрэя Козела. Еўрапарламент заклікаў неадкладна адмяніць блакаванне сайта Charter97.org і адмовіцца ад захадаў, якія пагражаюць свабодзе слова.