Леанід Кулакоў асуджаны на 10 дзён

Вырак вынес суд Першамайскага раёна Менска.

Актывіст грамадзянскай кампаніі «Еўрапейская Беларусь» Леанід Кулакоў асуджаны на 10 дзён адміністрацыйнага арышту, паведамляе сайт ПЦ «Вясна».

Сёння блізу 12 гадзін дня міліцыя ўварвалася ў дом да актывіста, пасля таго, як ён пад пагрозамі быў вымушаны адчыніць ім дзверы.

Капітан міліцыі Васіль Дзегцяроў паведаміў Леаніду Кулакову, што ён павінен праехаць з імі ў РУУС Першамайскага раёна, бо яшчэ 19 сакавіка адбыўся суд паводле адміністрацыйнай справы супраць яго. Цяпер узнікла рэзкая неабходнасць азнаёміць Леаніда Кулакова з пастановай суда.

Блізу 14.00 стала вядома, што Леанід знаходзіцца ў РУУС Першамайскага раёна. Неўзабаве яго павязуць у суд, дзе будуць судзіць паводле ч.3 арт.23:34.

Блізу 16.00 суд Першамайскага раёна пастанавіў пакараць Кулакова 10-дзённым арыштам.

Нагадаем, што 21 сакавіка ўлады арыштавалі лідараў Беларускага Нацыянальнага Кангрэсу Уладзіміра Някляева, Максіма Вінярскага і Вячаслава Сіўчыка.

Максіма Вінярскага і Вячаслава Сіўчыка асудзілі на 10 дзён адміністрацыйнага арышту, Уладзіміра Някляева - на 5 дзён.

Сёння раніцай менскі АМАП спрабаваў штурмаваць дом аднаго з лідараў Беларускага Нацыянальнага Кангрэсу, каардынатара грамадзянскай кампаніі «Еўрапейская Беларусь» Яўгена Афнагеля. Палітык быў арыштаваны.