Украінскага журналіста Паўла Шаройку за зачыненымі дзвярыма судзяць за «шпіянаж»

Пра пачатак разгляду рэзананснай міжнароднай справы стала вядома толькі сёння.

Аб правядзенні судовага працэсу 12 лютага сайту Беларускай асацыяцыі журналістаў baj.by паведаміла прэс-сакратарка Вярхоўнага суда Юлія Ляскова.

Працэс паводле справы ўкраінскага журналіста Паўла Шаройкі праходзіць у Вярхоўным судзе Беларусі ў закрытым рэжыме.

На пытанне, чаму пра пачатак разгляду рэзананснай міжнароднай справы стала вядома толькі сёння, Ляскова паведаміла, што ў судах Беларусі штодня разглядаецца блізу 4 тысяч спраў, і яна не можа ведаць пра пачатак кожнага працэсу.

Пра тое, калі пачаўся працэс над Шаройкам, Юлія Ляскова паведамляць адмовілася.

Нагадаем, акрэдытаваны ў Беларусі карэспандэнт «Украінскага радыё» Павел Шаройка быў затрыманы КДБ 25 кастрычніка 2017 года і змешчаны ў следчы ізалятар КДБ. Вядома пра гэта стала толькі праз тры тыдні, 17 лістапада, пасля паведамлення кіраўніка Нацыянальнай грамадскай тэлерадыёкампаніі Украіны Зураба Аласаніі ў Facebook.

20 лістапада стала вядома, што ў дачыненні да Шаройкі распачата справа паводле артыкула «шпіянаж», ён узяты пад варту.

Паводле інфармацыі КДБ, Шаройка «стварыў агентурную сетку з грамадзян Беларусі, якія за грашовае ўзнагароджанне выконвалі ягоныя заданні для збору звестак выведвальнага характару ў вайскова-палітычнай сферы». Ягоную дзейнасць каардынаваў супрацоўнік галоўнай управы выведкі Мінабароны Украіны Ігар Скварцоў, які дзейнічаў пад прыкрыццём на пасадзе дарадцы амбасады Украіны. Скварцоў быў абвешчаны персонай нон-грата і 25 кастрычніка высланы з Беларусі.