Эколаг: Акумулятарны завод за год выкіне ў паветра мінімум 270 кілаграмаў свінцу

Таксама на падобных прадпрыемствах могуць быць пазаштатныя сітуацыі, якія прыводзяць да залпавых выкідаў.

– Я лекар, і разумею ўсю сур'ёзнасць і няўхільнасць наступстваў для здароўя такога завода. Тут няма ніякай палітыкі. Тут ёсць непакой за здароўе дзяцей і дарослых, якія жывуць непасрэдна блізка, адпачываюць у найбліжэйшых санаторыях і ўжываюць прадукты з цяплічнага камбіната і з ворных земляў, размешчаных побач, – разважае ў каментары для kp.by Таццяна, жыхарка прадмесця Сцімава, недалёка ад якога будуецца акумулятарны завод.

Хваля абурэння захліснула берасцейцаў у канцы снежня. Тады з'явілася навіна, што за 3,5 км ад горада ў Свабоднай эканамічнай зоне «Брэст» пачалі будаваць акумулятарны завод. Тут будуць вырабляць свінцова-кіслотныя батарэі для аўтамабіляў. Заказчык – кампанія бізнэсоўца Віктара Лемяшэўскага «Ай-Паўэр». Падрадчык – будаўнічая карпарацыя з Кітая.

Праўда, гэтай навіна не такая ўжо і новая. Раённая газета «Заря над Бугом» публікавала аб'яву, што да 22 снежня праводзяцца грамадскія абмеркаванні справаздачы пра ўздзеянне завода на экалогію. Як высветлілася, жыхары Берасцейскага раёна і Бярэсця яе не бачылі.

– Пра завод мы даведаліся толькі з інтэрнэту. Нас не спыталі, ці хочам мы дыхаць свінцом, – незадаволеная берасцейка Вольга.

Цяпер мясцовыя жыхары актыўна збіраюць подпісы. Іх выправяць мясцовым уладам і ўласніку завода. Ужо больш за 1500 чалавек патрабуюць правесці паўторныя грамадскія абмеркаванні і хочуць данесці, што яны супраць небяспечнай вытворчасці паблізу горада.

«Як гэта адаб'ецца на тэрыторыі і здароўі людзей? Адкрытае пытанне»

Эксперт-эколаг на просьбу журналістаў вывучыў справаздачу наконт правядзення ацэнкі ўздзеяння акумулятарнага завода на навакольнае асяроддзе (АУНА). Гэты дакумент быў апублікаваны на сайце Берасцейскага райвыканкама і выносіўся на грамадскае абмеркаванне. У якім, як высветлілася, не ўсе жыхары раёна змаглі ўдзельнічаць.

– Мяркуючы з справаздачы, гэта будзе дастаткова магутны завод – там гаворыцца пра 1 мільён акумулятарных батарэяў за год. Калі прыкладна палічыць, то там будзе мінімум 12 тысячаў тонаў адлітага свінцу за год. І што мяне турбуе: не сказана, якія канкрэтна фільтры будуць выкарыстоўвацца. У АУНА напісана, што эфектыўнасць іх працы – да 99,8%. Гэта высокі паказнік, але гэта максімальная лічба. Калі выказаць здагадку, што фільтры будуць цэлы год працаваць з найбольшай эфектыўнасцю, то тыя, што засталіся, 0,2% дадуць мінімум 270 кг свінцу за год, якія трапяць у атмасфернае паветра. Дакумент нічога не кажа, як гэта адаб'ецца на тэрыторыі і здароўі людзей. Гэта адкрытае пытанне, – падлічвае Яўген Лабанаў, дырэктар Цэнтра экалагічных пастановаў. – Да таго ж, на падобных прадпрыемствах могуць быць пазаштатныя сітуацыі, якія прыводзяць да залпавых выкідаў. Вельмі важна, каб планаваная сістэма ачысткі была разлічаная на такія аварыйныя скіды.

Дакумент выклікаў у эксперта і іншыя пытанні. Напрыклад, колькі канкрэтна людзей жыве на прылеглай тэрыторыі, ці ёсць там садовыя таварыствы і сельскагаспадарчыя прадпрыемствы. Без гэтых звестак складана ацаніць цяперашні ўплыў завода на навакольнае асяроддзе.

– Што яшчэ выклікае заклапочанасць: уплыў завода на людзей, якія працуюць на аб'ектах непасрэдна блізка ад яго. Той самы аэрапорт – да яго адлегласць меншая, чым да населеных пунктаў, – звяртае ўвагу эксперт. – І яшчэ. У дакуменце мімаходзь згадваецца, што адкіды, якія ўтрымліваюць свінец, будуць знаходзіцца на тэрыторыі завода. Адразу ж пытанне: як яны будуць захоўвацца, як перасыпацца, пакавацца, транспартавацца? Я не бяруся сказаць, як завод будзе ўплываць на здароўе мясцовых жыхароў, але тут сапраўды патрэбныя дадатковыя даследаванні.