Каардынатара «Еўрапейскай Беларусі» Яўгена Афнагеля судзілі таемна

Улады баяцца праяваў салідарнасці з лідарамі народных пратэстаў.

Сёння ў судзе Цэнтральнага раёна Менска павінна была разглядацца справа каардынатара «Еўрапейскай Беларусі» Яўгена Афнагеля праз ягоны ўдзелу ў святкаванні Першамая ў цэнтры Менска. Аднак затрыманага ўчора ўвечары актывіста так і не прывезлі ў суд.

Марына Адамовіч, жонка аднаго з лідараў Беларускага Нацыянальнага Кангрэсу Мікалая Статкевіча распавяла Charter97.org, што Яўгена Афнагеля асудзілі таемна.

«Яўген Афнагель цяпер на Акрэсціна. Яго павінны былі прывезці сёння ў суд Цэнтральнага раёна і абвясцілі аб тым, што будуць судзіць менавіта там. Але ў выніку ў гэты суд Афнагеля так і не прывезлі, а пазней адвакату паведамілі, што ён ужо асуджаны і знаходзіцца на Акрэсціна. Пры гэтым не сказалі – дзе і хто асудзіў і колькі «сутак» далі», - распавяла Марына Адамовіч.