Лукашэнка: Мы не дзелім Расею і Беларусь па межах

Дыктатар паскардзіўся расейцам на NATO і пакляўся ў «вечнай дружбе».

Мы не дзелім Расею і Беларусь па межах, а спрабуем пабудаваць нешта агульнае, заявіў Лукашэнка сёння на сустрэчы з губернатарам Калінінградскай вобласці Расеі Антонам Аліханавым, паведамляе БелТА.

«Спадзяюся, мы будзем і далей развіваць нашы стасункі менавіта ў тым ключы, што мы людзі не чужыя, у нас адзіная бацькаўшчына. Мы не дзелім Расею і Беларусь па межах, а спрабуем пабудаваць нешта агульнае - назвалі яго саюзнай дзяржавай», - сказаў Лукашэнка.

Лукашэнка звярнуў увагу на асобныя пытанні, з якімі сутыкаецца як Беларусь, так і Калінінградская вобласць, а ў яе асобе Расея. «Тое, што адбываецца на межах з Беларуссю, - гэта люстраны адбітак мяжы з Калінінградам. Мы сутыкаемся твар у твар, лоб у лоб з актывізацыяй NATO. Ды і ў эканоміцы, ведаеце, у гандлі кожны пераследуе там свае інтарэсы. Не скажу, што яны нас ужо вельмі любяць - і вас, і нас, Расею і Беларусь. Таму, як бы тут не абмяркоўвалі гэтыя пытанні, не рабілі нас празаходнімі і гэтак далей, мы выдатна разумеем, што гэта рыторыка. А канкрэтныя факты кажуць пра тое, што нам няма на каго разлічваць, нам, беларусам і расейцам, трэба бачыць свой інтарэс, цікавасць сваіх народаў», - падкрэсліў Лукашэнка.

«Вы заўсёды можаце разлічваць на Беларусь. У цяжкую хвіліну мы заўсёды падставім плячо», - сказаў Лукашэнка.