«Гэта што, усе школьнікі дружна ў Польшчу кінуліся?»

На беларуска-польскай мяжы ўтварыліся велізарныя чэргі.

На гэтых выходных ва ўсіх школах краіны пачаліся вясновыя канікулы. Яны працягнуцца тыдзень — з 22 па 29 сакавіка. У адным з чатаў, дзе абмяркоўваюць сітуацыю з перасячэннем беларуска-польскай мяжы, карыстальнікі пачалі жартаваць, што, відаць, дзеці сабраліся за мяжу, бо чэргі з аўтобусаў рэзка выраслі, піша «Зеркало».

Гаворка пра чат, дзе абмяркоўваюць перасячэнне мяжы ў пункце пропуску «Брэст» (сумежны — «Тэрэспаль»). Яшчэ позна ўвечары ў пятніцу, 19 сакавіка, тут з'явілася паведамленне, якое настройвала людзей, што вырашылі ехаць у Польшчу аўтобусам, на больш працяглае чаканне ў чарзе.

«[У пунктах пропуску] «Брэст — Тэрэспаль» [сітуацыя з] аўтобусамі: «стаметроўка» запоўненая практычна цалкам аўтобусамі, месцамі ў два рады. Унутры перад кантролем сем [аўтобусаў], на кантролі два, д'юці-фры ўсё забіта <�…>».

У суботу, 21 сакавіка, у гэтым жа чате з'явілася інфармацыя, што адпраўленне некаторых аўтобусаў з Польшчы ў Беларусь пераносіцца на больш позні тэрмін. Прычына — «працяглае праходжанне дзяржаўных межаў». Паводле звестак адміністратара чата, тыя, хто вырашыў ехаць аўтобусам з Беларусі ў Польшчу, стаялі ў чарзе каля 14 гадзін, у зваротным напрамку — каля чатырох гадзін.

«На мяжу прыехалі а 19.15, перайшлі з 16-га аўтобуса ў першы, а 20.15 заехалі пад шлагбаум, а 23.30 выехалі. 00.30 заезд у РП. А 02.40 маглі выехаць, але ў кагосьці знайшлі цыгарэты. Стаім, чакаем», — у ноч з пятніцы на суботу напісаў яшчэ адзін карыстальнік.

Некаторыя карыстальнікі звязалі сітуацыю на мяжы са школьнымі канікуламі.

«Падобна, гэта школьныя канікулы з 22 па 29. Вечна чэргі падчас канікул», — напісала адна з карыстальніц.

«І што, усе школьнікі дружна ў Польшчу кінуліся?» — пажартаваў другі ўдзельнік размовы.

«Ніякіх дзяцей няма, палова аўтобусаў перад шлагбаумам стаяла паўпустая», — адзначыў трэці.

У нядзелю, 22 сакавіка, сітуацыя ў пункце пропуску «Брэст», відаць, не змянілася. Паводле дадзеных Дзяржаўнага памежнага камітэта, а 10.00 22 сакавіка на выезд з Беларусі ў Польшчу знаходзіцца 40 аўтобусаў. Адміністратар чата ўдакладняе, што гэта транспарт у зоне чакання. А перад шлагбаумам «іх яшчэ каля 12».

«Хтосьці ў курсе, што адбываецца на мяжы РБ — РП? Чарга проста стаіць», — каля пятай раніцы падзяліўся назіраннямі адзін з карыстальнікаў.

«Ужо гадзіны чатыры ніводнага прасоўвання, усё спынілася», — а 9.20 па Мінску адзначыў іншы.

«Падарожнікі паведамляюць пра татальнае чаканне: праходжанне межаў займае ад 15 да 22 гадзін. Зона чакання для легкавых аўто фармальна пустая, але на самым мосце і перад пашпартным кантролем глухі затор — машыны могуць стаяць без руху па некалькі гадзін», — адзначыла адміністратарка чата.

Паводле яе інфармацыі, адна з прычын сітуацыі, якая склалася, — тое, што «абсалютна ўвесь транспарт» накіроўваюць на рэнтген. Гэта і аўтобусы, і аўтамабілі.

— [Плюс] канікулы ў РБ у дзяцей — экскурсіі, госці, да сваякоў у РП, — дадала яна.

Паводле дадзеных Дзяржаўнага памежнага камітэта на 10.00 22 сакавіка, у пункце пропуску «Бераставіца» (сумежны — «Баброўнікі») аўтобусаў у чарзе няма.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]