Памілаваныя Пуціным «героі СВА» зладзілі перастрэлку з паліцэйскімі на Рублёўцы

І забілі таксіста.

Увечары 3 лютага двое мужчын адкрылі агонь па паліцэйскіх у Маскве, якія спрабавалі затрымаць іх па справе аб выкраданні і забойстве чалавека ў Пензенскай вобласці, паведаміла прэс-сакратарка МУС Ірына Воўк. Яна ўдакладніла, што перастрэлка адбылася ў доме на Рублёўскім шосэ — у выніку адзін з падазраваных быў забіты, другога затрымалі. Пазней Воўк паведаміла, што злачынцы таксама расправіліся з таксістам, які падвёз іх да сталіцы.

Дзяржаўныя СМІ публікавалі арыенціроўку на падазраваных — 41-гадовага Міхаіла Леанцьева і 39-гадовага Аляксея Ланчыкава. Абодва раней былі судзімыя за забойствы і іншыя цяжкія злачынствы. Паводле звестак крыніцы «ВЧК-ОГПУ», у 2022 годзе іх у калоніях завербавала ПВК «Вагнер» для ўдзелу ў вайне супраць Украіны. Па заканчэнні кантрактаў яны вярнуліся на «грамадзянку», прынамсі адзін з іх атрымаў памілаванне ад прэзідэнта Уладзіміра Пуціна. Крыніца ўдакладніла, што гэта быў Леанцьеў, яго ж застрэлілі паліцэйскія.

Да адпраўкі на вайну ён адбываў 23-гадовы тэрмін за забойства ў калоніі № 5 Пензенскай вобласці. Згодна з прысудам, у 2014 годзе Леанцьеў і ягоны прыяцель з прозвішчам Касалапаў застрэлілі двух чалавек — Марыю Ліпіліну і Раміля Кадышава, а таксама скралі ў іх мабільны тэлефон, ювелірныя вырабы і аўтамабіль Kia. А крыху раней да гэтага фігуранты абрабавалі святара. Саўдзельнік Леанцьева пазней здзейсніў суіцыд, перад смерцю паведаміўшы пра здзейсненыя злачынствы.

Ланчыкаў да адпраўкі на фронт адбываў тэрмін у той жа пензенскай калоніі — у 2014 годзе яго асудзілі на 13 гадоў пазбаўлення волі за забойства, згвалтаванне і гвалтоўныя дзеянні сэксуальнага характару ў дачыненні да дзяўчыны, якая знаходзілася ў несвядомым стане, высветліла «Агенцтва» з уцечак паліцэйскіх зводак. Пры гэтым Ланчыкаў быў судзімы некалькі разоў. У маі 2024 года ён атрымаў статус ветэрана баявых дзеянняў.

Паводле дадзеных ААН, для ўдзелу ў вайне ва Украіне былі завербаваныя 170 тысяч асуджаных расіян, якія здзейснілі гвалтоўныя злачынствы. Згодна з падлікамі «Версткі», за тры гады баявых дзеянняў «героі СВА», што вярнуліся з фронту, забілі і пакалечылі найменш 750 чалавек. На люты 2025 года было вядома пра 378 загінулых і 376 цяжка пацярпелых.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]