Ціханоўскі заклікаў ЗША мудра скарыстаць наяўны рычаг ціску на Лукашэнку
15- 4.02.2026, 12:09
- 6,210
Былы палітвязень выступіў на слуханнях у Кангрэсе.
На дадзены момант існуюць «толькі тры рэальныя шляхі» вызвалення палітвязняў, якія застаюцца ў закладніках у Аляксандра Лукашэнкі: «замежная ваенная інтэрвенцыя, вываз іх за мяжу ў абмен на нешта або прымусовая дыпламатыя, якую праводзіць прэзідэнт ЗША Дональд Трамп». Такую думку выказаў Сяргей Ціханоўскі 3 лютага на слуханнях па сітуацыі з правамі чалавека ў Беларусі ў Камісіі па правах чалавека Тома Лантаса у Кангрэсе ЗША. Былы беларускі палітвязень выступіў у якасці аднаго з сведкаў, піша «Позірк».
Пры гэтым ён паведаміў, што падтрымлівае трэці варыянт.
Паводле Ціханоўскага, Трамп патрэбны Лукашэнку значна больш, чым Лукашэнка патрэбны Трампу, што дае амерыканскай адміністрацыі «вялізны рычаг ціску» на беларускага дыктатара, які былы палітвязень заклікаў выкарыстоўваць мудра.
Як заявіў Ціханоўскі, Лукашэнка гандлюе з Вашынгтонам не толькі закладнікамі, але і актыўна імкнецца прыцягнуць амерыканскі бізнес да беларускіх нацыянальных авіяліній, у калійную галіну і атамную энергетыку. Ён таксама звярнуў увагу на актыўныя спробы Лукашэнкі сыграць ролю пасярэдніка ў адносінах паміж ЗША і Расіяй.
З улікам усіх згаданых фактараў, на думку Ціханоўскага, пры наяўнасці палітычнай волі Вашынгтона можна не толькі дамагчыся ад Лукашэнкі вызвалення ўсіх закладнікаў рэжыму, але і настаяць на спыненні палітычных рэпрэсій.
Ён таксама адзначыў, што мае «дадатковыя рэкамендацыі», якія аддае перавагу абмяркоўваць «у прыватным парадку, непублічна».
«Я прашу вас аб адной рэчы: калі ласка, не спыняйцеся. Вы ўжо выратавалі лекараў, палітыкаў, блогераў і нават лаўрэата Нобелеўскай прэміі міру (Аляся Бяляцкага), але больш за 1 100 чалавек застаюцца ў зняволенні», — звярнуўся Ціханоўскі да прадстаўнікоў ЗША.
Сведка таксама расказаў пра ўмовы свайго ўтрымання ў месцах пазбаўлення волі, асобна падзякаваўшы амерыканскаму боку за вызваленне.
Ціханоўскі адзначыў, што ў зняволенні ў Беларусі знаходзяцца людзі, якіх, як ён выказаўся, Лукашэнка хавае ад амерыканскага боку і «не пагодзіцца вызваліць ні пры якіх абставінах». Да іх ён аднёс былых суддзяў, следчых, афіцэраў службаў бяспекі, юрыстаў і чыноўнікаў, якіх Лукашэнка лічыць здраднікамі. Паводле былога палітвязня, такія людзі ўтрымліваюцца ў найбольш цяжкіх умовах і «падвяргаюцца самым брутальным катаванням».
Пры гэтым Ціханоўскі назваў імя аднаго з іх — былога афіцэра спецслужбаў Уладзіміра Кнігу, якога трэба «выратаваць як мага хутчэй, калі ён яшчэ жывы».
Старшыня слуханняў, член Палаты прадстаўнікоў Кангрэса ЗША ад Рэспубліканскай партыі Крыстафар Сміт, адкрываючы мерапрыемства, між іншым заявіў, што ўлады ЗША (у адрозненне ад іх прэзідэнта Дональда Трампа. — «Позірк».) не прызнаюць Лукашэнку легітымным прэзідэнтам Беларусі.
Будучы ініцыятарам і асноўным аўтарам наяўных чатырох рэдакцый Акта аб дэмакратыі ў Беларусі, Сміт выказаў упэўненасць, што Кангрэс прыме і распрацаваную ім пятую рэдакцыю дакумента, які ўпершыню быў прыняты ў 2004 годзе і абнаўляўся ў 2006, 2011 і 2020 гадах.
Камісія па правах чалавека Тома Лантаса (Tom Lantos Human Rights Commission) — двухпартыйная камісія па правах чалавека пры Палаце прадстаўнікоў Кангрэса ЗША.
Яна сочыць за сітуацыяй з правамі чалавека ў розных краінах, праводзіць адпаведныя слуханні і брыфінгі, дае рэкамендацыі амерыканскім заканадаўцам і дзяржаўным структурам.
Акрамя Сяргея Ціханоўскага ў якасці сведкаў на слуханнях 3 лютага выступілі дарадца Святланы Ціханоўскай па дыпламатычных пытаннях Дзяніс Кучынскі, кіраўнік літоўскага офіса праваабарончай арганізацыі Freedom House Віціс Юрконіс і міжнародная юрыстка па правах чалавека з ЗША Жасмін Д. Кэмерон.
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас [email protected]
