Разнос са смакам

Беларуская эканоміка ўступіла на слізкую траекторыю альтэрнатыўнага росту.

ВУП краіны за студзень знізіўся на 1,2 працэнта. Прамысловасць правалілася амаль на тры з паловай. Флагманы беларускай прамысловасці наўрад ці напалову выканалі заданні па экспарце.

У новым выпуску праграмы «Аптымум» на YouTube-канале «Белорусы и рынок» — пра тое, што прыдумалі чыноўнікі, каб выратаваць эканоміку ад крызісу.

Разнос са смакам

Частка стратных прадпрыемстваў за 2025 год вырасла да 13,3 працэнта. У гандлі, якому частковая адмена цэнавага рэгулявання не надта дапамагла, колькасць стратных кампаній падскочыла на 43,5 працэнта. Сума страт пры гэтым павялічылася больш чым у два разы. На 26 працэнтаў вырасла дэбіторская запазычанасць — гэта значыць даўгі перад прадпрыемствамі, на 18 працэнтаў — крэдыторская.

То-бок літаральна ўсё пайшло не так, як планавалі.

Таму на мінулым тыдні Лукашэнка зладзіў сваім чыноўнікам разнос і даў вельмі канкрэтнае даручэнне: тэрмінова спыніць спад у прамысловасці і разгрузіць склады.

Даручана — выканана. І месцамі нават раней, чым даручылі. Ну не ў тым сэнсе, што спад спынілі і склады разгрузілі — барані Божа, гэты цягнік даўно сышоў.

А ў тым сэнсе, што чыноўнікі літаральна адразу адрапартавалі: яны ведаюць, як усё выправіць. У іх ёсць вельмі просты рэцэпт. Эканоміка павінна быць эканамнай, а дысцыпліна — дысцыплінаванай. Тады росквіт будзе росквітаць, а стабільнасць застанецца стабільнай.

«Сакрэт поспеху — у простай дысцыпліне. Усе задачы міністры на месцах ведаюць, і іх трэба выконваць, а ў гэтым — дысцыпліна», — сказаў у інтэрв’ю беларускаму тэлебачанню міністр эканомікі Юрый Чабатар.

Чаму раней дысцыпліна не была дысцыплінаванай, як належыць, міністр Чабатар не ўдакладніў. Хаця гэты рэцэпт улада рэгулярна «прапісвае» эканоміцы, пакуль ён ні разу не дапамог. Магчыма, раней даручэнні былі недастаткова канкрэтнымі. А цяпер, з канкрэтнымі даручэннямі, беларуская эканоміка канкрэтна расквітнее.

Справу зроблена

У нядзелю, 22 лютага, на беларускім тэлебачанні выйшла інтэрв’ю міністра прамысловасці Андрэя Кузняцова. На пытанне пра тое, як выконваецца даручэнне ўвесці ручное кіраванне на прадпрыемствах, што знаходзяцца ў крытычным становішчы, міністр радасна адрапартаваў, што яно ўжо амаль выканана.

«Сапраўды, цяпер мы ўжо перавялі на ручное кіраванне з 21 прадпрыемства 20 прадпрыемстваў», — сказаў ён.

Насамрэч 21 прадпрыемства — гэта не проста заводы. Гэта флагманы беларускай прамысловасці, з якіх 17 з’яўляюцца вядучымі кампаніямі холдынгаў.

Напрыклад, у холдынг Мінскага трактарнага завода ўваходзіць пятнаццаць прадпрыемстваў. У холдынг «БЕЛАВТОМАЗ», які ўзначальвае Мінскі аўтамабільны завод, — пяць. То-бок, па вялікім рахунку, 21 флагман — гэта аснова ўсёй беларускай прамысловасці.

Атрымліваецца, што з 21 флагмана ў крытычным становішчы знаходзяцца дваццаць. А калі ўлічваць, што холдынгі аб’ядноўваюць дзясяткі прадпрыемстваў, выходзіць, што значная частка беларускай прамысловасці апынулася ў пагрозлівым стане.

Не кажучы ўжо пра тое, што ручное кіраванне — увогуле не падстава для гонару. Сэнс працы ўрада не ў тым, каб кіраваць заводамі ў ручным рэжыме — для гэтага на прадпрыемствах ёсць дырэктары. Задача ўрада — стварыць умовы, пры якіх у ручным кіраванні няма патрэбы. Тым больш што вынікі такога кіравання можна прадказаць загадзя.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]