Рада ЕС вярнула пад санкцыі беларускае прадпрыемства, якое змагло ад іх адбіцца ў 2024-м

Яно знаходзіцца ў Бабруйску.

Бабруйскае прадпрыемства «Белшына» ізноў апынулася пад санкцыямі Еўрасаюза. Такое рашэнне прыняла Рада ЕС, адпаведная інфармацыя 26 лютага была апублікаваная ў Афіцыйным часопісе Еўрасаюза, заўважыла «Зеркало».

Гэта ўжо другі выпадак, калі «Белшыну» ўключаюць у еўрапейскі санкцыйны спіс. Упершыню яна трапіла пад абмежаванні 2 снежня 2021 года, аднак праз некаторы час стала адным з нямногіх беларускіх прадпрыемстваў, якім удалося дамагчыся выключэння сябе з санкцыйнага спісу Еўрасаюза.

Так, Суд Еўрапейскага саюза ў Люксембургу ў сакавіку 2024 года вырашыў, што кампанію бездаказна абвінавацілі ў фінансаванні рэжыму і падтрымцы вайны Расіі супраць Украіны. Хоць Беларускі расследавальніцкі цэнтр (БРЦ) знайшоў інфармацыю, якая сведчыць, што паралельна з аспрэчваннем санкцый прадпрыемства пастаўляла шыны на расійскі рынак, дзе яны выкарыстоўваліся для арміі гэтай краіны.

У абгрунтаванні паўторнага ўключэння ў санкцыйны спіс гаворыцца, што ААТ «Белшына» — буйны дзяржаўны вытворца шын у Беларусі, прыбытковы і наўпрост выгадны для дзяржавы. Кампанія пастаўляе шыны расійскім вайскоўцам ва Украіне, а дыстрыб'ютарам у Расіі з'яўляецца Дзмітрый Лукашэнка.

Супрацоўнікаў прадпрыемства, якія пратэставалі пасля выбараў 2020 года, звальнялі або змушалі звольніцца, а палітвязняў прыцягвалі да небяспечных прац. Кампанія атрымлівае дзяржаўную дапамогу, падатковыя льготы і дзяржаўныя закупкі без тэндэраў, што робіць яе залежнай ад уладаў і датычнай да рэпрэсій супраць грамадзянскай супольнасці.

Акрамя «Белшыны», у санкцыйным спісе ЕС значацца і іншыя буйныя беларускія прадпрыемствы, уключаючы «Беларуськалій», МЗКЦ, «Гродна Азот», «Белтэхэкспарт», 140-ы рамонтны завод, а таксама філіял «Гродна Азота» — «Завод Хімвалакно».

У пералік таксама ўключаныя 54 службовыя асобы. Сярод фігурантаў — прэм'ер-міністр Аляксандр Турчын, старшыня «палаты прадстаўнікоў» парламента Ігар Сяргеенка і кіраўнік МЗС Максім Рыжанкоў.

Як паведамілі ў МЗС Літвы, Рада ЕС падоўжыла санкцыі супраць Беларусі на год — да 28 лютага 2027 года. Меры ўведзеныя з-за рэпрэсій унутры краіны, падтрымкі Расіі ў вайне супраць Украіны і гібрыдных атак на краіны ЕС. Пад санкцыямі цяпер 312 грамадзян і 57 арганізацый: іх актывы ў ЕС замарожаныя, ім забароненыя фінансавыя аперацыі і ўезд на тэрыторыю блоку.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]